جامعہ محمدیہ منصورہ میں تین سو بیڈ اسپتال قرنطینہ کیلئے مختص

ریاست مہاراشٹر کے مسلم اکثریتی شہر مالیگاؤں میں کورونا وائرس کے مریضوں کی تعداد میں مسلسل اضافہ ہو رہا ہے ایسے حالات میں جامعہ محمدیہ منصورہ کیمپس نے مالیگاؤں کارپویشن کو یونانی میڈیکل کالج و اسپتال قرنطینہ کیلئے پیش کیا ہے۔

منصورہ کیمپس کے چیئرمین ڈاکٹر ارشد مختار نے کہا کہ منصورہ طبیہ کالج میں تین سو کورونا وائرس کے مریضوں کو تمام تر طبی و دیگر سہولیات کے ساتھ رکھا جا سکتا ہے۔

انہوں نے کہا کہ گزشتہ روز کارپوریشن کمشنر کی جانب سے منصورہ کیمپس کیلئے عرضی دی گئی تھی جس پر منصورہ کیمپس کے ذمہ داران نے اہم فیصلہ لیا اور کالج کی چار منزلہ عمارت کارپوریشن کے حوالے کر دی ہے۔ پرنسپل ڈاکٹر ابوالعرفان کے مطابق ’’منصورہ طبیہ کالج شہر مالیگاؤں کا ایک قدیم ادارہ ہے۔

اس کالج میں یونانی میڈیسن ڈگری کورس جاری ہے اور ساتھ ہی تجربہ کار ڈاکٹروں پر مشتمل اسپتال بھی جاری ہے۔‘‘

لاک ڈاؤن کے دوران منصورہ کالج کی جانب سے مسلسل فلاحی کاموں کو انجام دیا جا رہا ہے، کالج کی جانب سے پندرہ سو راشن کٹ کی تقسیم، پولیس انتظامیہ اور صحافی حضرات کو سںیٹائز دیا گیا۔