مالیگاؤں: گرنا ڈیم میں نوجوان کی ڈوبنے سے موت

شہر مالیگاؤں کے دیہاتی علاقے میں واقع گرنا ڈیم میں سرتاج احمد جان محمد نامی نوجوان کی ڈوب جانے سے موت ہوگئی۔ قلعہ تیراک گروپ نے 30 سے 35 فٹ گہرے پانی میں گھنٹوں مشقت کے بعد لاش کو باہر نکالا۔

ریاست مہاراشٹر کے شہر مالیگاؤں کے دیہاتی علاقے میں واقع گرنا ڈیم میں ایک نوجوان کے ڈوب جانے سے موت ہوگئی۔ نوجوان کی شناخت سرتاج احمد جان محمد کے طور پر ہوئی ہے، جس کا تعلق نئی بستی قلعہ مالیگاؤں سے ہے۔ اس نوجوان کی عمر بیس برس ہے اور وہ صبح کے وقت گرنا ڈیم پر اپنے دوستوں کے ساتھ مچھلی پکڑنے کی غرض سے گیا ہوا تھا۔ لیکن پھر سرتاج احمد اور اس کے ایک ساتھی نے پانی میں چھلانگ لگا دی۔ پانی زیادہ ہونے کی وجہ سے سرتاج کی ڈوب کر موت ہوگئی۔ اس کے ساتھی کو گاؤں کے لوگوں نے بچا لیا۔

سماجی کارکن شفیق شیخ نے نمائندے ای ٹی وی بھارت کو بتایا کہ گاؤں کے لوگوں کے ساتھ ساتھ اس کے ساتھیوں نے اس کی لاش کو گرنا ڈیم میں گھنٹوں تلاش کیا لیکن انہیں لاش نہ ملنے کی وجہ سے گاؤں کے سرکردہ افراد نے ان سے رابطہ کیا اور اس حادثے کی اطلاع دی۔ اس کے بعد موصوف نے جائے واقعہ پر قلعہ تیراک گروپ کو روانہ کیا اور قلعہ تیراک گروپ نے 30 سے 35 فٹ گہرے پانی میں گھنٹوں مشقت کے بعد لاش کو باہر نکالا۔ اس کے بعد لاش کو ایمبولینس کے ذریعے سول ہسپتال میں لایا گیا۔ پوسٹ مارٹم اور تمام قانونی تکمیل کے بعد لاش کو اہل خانہ کے حوالے کر دیا گیا۔