اب اس معاملے میں ڈپٹی کمشنر پر بھی کارروائی کی جائے گی۔ یہ اعلان ودھان پریشد میں وزیراعلیٰ دیویندر فڑنویس نے کیا ہے۔
وزیراعلیٰ نے بتایا کہ 'ہمالیہ پل کی جلد سے جلد تعمیر کے لیے آئی آئی ٹی ممبئی سے تکنیکی معلومات حاصل کی گئی ہے۔ چھ مہینے میں پل تعمیر کیا جائے گا نیز شہر و مضافات کے پلز کے لیے تھرڈ پارٹی آڈٹ کرایا جا رہا ہے۔'
حزب اختلاف کے رہنما دھننجے منڈے نے یہ معاملہ اٹھایا تھا جس پر ریاستی وزیر برائے شہری ترقیات یوگیش ساگر نے ممبئی کے پلز کے تھرڈ پارٹی اسٹرکچرل آڈٹ کرانے کی اطلاع دی ہے۔
اس درمیان کانگریس کے رکن بھائی جگتاپ نے ہمالیہ پل حادثے میں محض جونیئر انجینیئر پر کارروائی کرنے کی بات کہی اور اعلیٰ آفیسرز سمیت دیسائی کے ذریعے کیے گئے آڈٹ پر کارروائی نہیں کرنے پر سوال اٹھایا۔ بھائی جگتاپ نے ڈپٹی کمشنر اور چیف انجینیئر پر کارروائی کرنے کا مطالبہ کیا۔
جس پر وضاحت پیش کی گئی کہ ریاستی وزیر یوگیش ساگر نے اس ضمن میں کمیٹی تشکیل دی ہے اور چیف انجینیئر کو معطل کیا گیا ہے۔ اس کے علاوہ ڈپٹی کمشنر پر بھی کارروائی کی جائے گی اور اسکائی واک کے تعلق سے ایک مہینے میں کارروائی کی جائے گی۔
واضح رہے کہ رواں برس مارچ میں سی ایس ایم ٹی ریلوے اسٹیشن سے متصل ہمالیہ پل کے اچانک منہدم ہونے کے سبب 6 افراد ہلاک اور متعدد زخمی ہوئے تھے۔