پانچ سال میں ہی سڑکیں اور پل بارش کی نظر

سڑک اور پل بہہ جانے سے مذکورہ گاؤں کا رابطہ دوسرے علاقوں سے منقطع ہوگیا ہے۔ گاؤں کے مکینوں کو اپنی ضروریات زندگی کو پورا کرنے کے لیے گہرے پانی سے ہوکر گزرنے پر مجبور ہونا پڑرہا ہے۔

ریاست مہاراشٹر کے دارالحکومت ممبئی سے محض 60 کلو میٹر دور تھانے ضلع کے بھیونڈی تعلقہ کے دیہی علاقے کےگرام پنچایت کی حدود میں آنے والے علاقوں میں سیلابی صورتحال بنی ہوئی ہے۔
سیلابی صورتحال کے سبب علاقے کی سڑکیں اور پل سیلاب کی زد میں آکر بہہ گئے ہیں۔

سڑک اور پل بہہ جانے سے مذکورہ گاؤں کا رابطہ دوسرے علاقوں سے منقطع ہوگیا ہے۔ گاؤں کے مکینوں کو اپنی ضروریات زندگی کو پورا کرنے کے لیے گہرے پانی سے ہوکر گزرنے پر مجبور ہونا پڑرہا ہے۔

سڑک اور پل کے تعلق سے ضلع انتظامیہ کے تمام دعووں کی پول کھل گئی ہے۔ فی الحال گذشتہ دنوں پیدا ہونے والی سیلابی صورتحال کے بعد بھی کوئی اعلیٰ افسر اس علاقے میں نہیں پہنچ سکا ہے جو مقامی باشندوں کی دشواریوں اور سڑکوں کے حالات کا جائزہ لے سکے۔

حکومت اور ضلع انتظامیہ بھلے ہی سبھی گاؤں کو مین شاہراہ سے جوڑنے کا دعویٰ کر رہے ہوں مگر مقامی افراد نے اس میں مبینہ طور سے بدعنوانی کا الزام عائد کیا ہے۔

سیلابی صورتحال کے پیش نظر سڑکوں اور پلوں کے بہہ جانے سےطلباء نہ اسکول جا پا رہے ہیں اور نہ مقامی لوگ اپنی کوئی ضرورت پوری کر پا رہے ہیں۔تاہم تمام گاڑیوں کی آمدو رفت کا سلسلہ بند ہوچکا ہے۔

ان تمام حالات کے مد نظر اب تک ضلع انتظامیہ کے کسی بھی افسر کے دورہ نہ کرنے کو لیکر مقامی افراد میں شدید ناراضگی ہے۔

مقامی لوگوں کا کہنا ہے کہ گذشتہ برس بھی ہونے والی موسلادھار بارش میں یہ سڑک بہہ گئی تھی مگر 5 برس کی وارنٹی ہونے کے سبب چار ماہ قبل اس سڑک کی مرمت کا کام ٹھیکیدار نے کیا تھا۔

مگر چار ماہ بعد آج اس کی وارنٹی مدت مکمل ہوتے ہی سڑک اور پل دونوں پانی میں بہہ گئے، مقامی لوگوں نے اس میں بدعنوانی کئے جانے کا الزام عائد کرتے ہوئے اس سڑک اور پل کے تعمیر کا کام انجام دینے والی کمپنی کی جانچ کرنے، اور اس کے خلاف سخت کارروائی کا مطالبہ کررہے ہیں۔