26 جنوری کو یوم جمہوریہ کی تقریب کے موقع پر دہلی کے لال قلعہ میدان پر ہوئے کسانوں اور پولیس کے درمیان تصادم کے دوران رامپور کے ایک 26 سالہ نوجوان کسان نوریت سنگھ کی موت واقع ہو گئی تھی، جس کے بعد مہلوک کے اہل خانہ نے لاش کو رامپور لاکر پوسٹ مارٹم کے بعد اس کے آبائی گاؤں ڈبڈبا میں آخری رسومات ادا کر دی تھی۔
نوریت سنگھ کے گھر پر تعزیت کرنے والوں کا تانتا لگا ہوا ہے۔ اسی دوران آج مسلم ملی قائدین کا بھی ایک وفد مہلوک نوریت سنگھ کے گاؤں ڈبڈبا پہنچا۔ تنظیم اتحاد ملت کے صدر فرحت احمد خان جمالی نے کسان نوریت سنگھ کی موت پر اپنے گہرے غم و غصہ کا اظہار کرتے ہوئے کہا کہ کسانوں کی اس طرح سے اموات حکومت کی نااہلی کو ثابت کرتی ہیں۔
انہوں نے کہا کہ جو واقعہ لال قلعہ پر پیش آیا اس کی ہم مذمت کرتے ہیں لیکن یہ واقعہ پیش آئے، اس کا موقع کس نے دیا؟ فرحت جمالی نے کہا کہ اگر حکومت اپنی ہٹھ دھرمی اور ضد چھوڑ دیتی تو یہ ناخوشگوار واقعہ کبھی پیش نہیں آتا۔
وہیں دوسری طرف مہلوک کے اہل خانہ پولیس کی تحقیقات پر یقین نہیں کر رہے ہیں۔ وہ اعلیٰ سطحی جانچ کا مطالبہ کر رہے ہیں۔ مہلوک کے دادا 82 سالہ ہردیپ سنگھ ڈبا کہتے ہیں کہ ان کے پوتے کو پولیس نے گولی مارکر ہلاک کیا ہے اور پولیس خود کو بچانے کے لیے من گھڑت کہانیاں بنا رہی ہے۔
انہوں نے کہا کہ اگر کسانوں نے ہی یہ تشدد برپا کیا ہے تو وہ گزشتہ 2 ماہ سے کیسے پرامن طریقہ سے اپنی تحریک چلا رہے تھے؟ تعزیت کرنے والے مسلم رہنماؤں کے وفد کی جانب سے جمعیت علمائے ہند کے ضلع صدر مولانا اسلم جاوید قاسمی، مولانا انصار احمد قاسمی، اسلم حسن خاں اور ریحان خان نے بھی اپنی تعزیت کا اظہار کیا۔
