میرٹھ: اعظم خان کی رہائی کے مطالبے پر ایس پی کارکنان کا احتجاج

اتر پردیش کے میرٹھ شہر میں سماج وادی پارٹی کارکنان نے احتجاجی مظاہرہ کرتے ہوئے پارٹی کے سینئر لیڈر اعظم خان کی رہائی کا مطالبہ کیا۔

میرٹھ میں سماج وادی پارٹی کارکنان نے رکن پارلیمان اعظم خان کی رہائی کا مطالبہ کرتے ہوئے ضلع کلکٹریٹ آفس کے باہر احتجاج کرتے ہوئے یوگی حکومت کے خلاف نعرے بازی کی۔

احتجاج کر رہے کارکنان نے یوپی گورنر کے نام ایک میمورنڈم پیش کرتے ہوئے اعظم خان کی جلد رہائی کی مانگ کی۔

احتجاج کر رہے کارکنان کا کہنا تھاکہ ’’یوگی حکومت بدلے کی نیت سے کام کر رہی ہے۔ بکری چوری، بھینس چوری سمیت مختلف مقدمات کے تحت ذی عزت شہری اور رکن پارلیمان اعظم خان کو جیل میں قید کر کے رکھا گیا ہے۔‘‘

انہوں نے یو پی حکومت کو تنقید کا نشانہ بناتے ہوئے کہا کہ ’’اعظم کی طبیعت خراب ہونے کے باوجود انہیں جان بوجھ کر قید و بند کی صعوبتوں سے گزارا جا رہا ہے، جو جمہوری اقدار کے بالکل برعکس ہے۔‘‘

سماج وادی پارٹی کارکنان نے حکام سے اعظم خان پر عائد کیے گئے الزمات کو کالعدم قرار دیے جانے اور انہیں فوری طور رہا کرنے کی مانگ کی۔