حکومت اقلیتوں کی فلاح و بہبود کے لیے کام کر رہی ہے: ریتو راج

اقلیتی کمیشن کے رکن نے میرٹھ میں کہا کہ ''ہم ہجومی تشدد کو نہیں روک سکتے، تاہم ملزمین کو سزا دلانے کی کوشش کرتے ہیں۔''

میرٹھ: اتر پردیش کے ضلع میرٹھ میں اقلیتی کمیشن کے ممبر ریتو راج جین نے سرکٹ ہاؤس میں اقلیتوں سے جڑے محکموں کے افسران کے ساتھ ایک میٹنگ کی جس میں انہوں نے حکومت کی جانب سے چلائی جا رہی فلاحی اسکیمز کو اقلیتی سماج کے لوگوں تک پہنچانے کی بات کہی۔

اس موقع پر اقلیتی کمیشن کے رکن ریتو راج جین نے میرٹھ میں کہا کہ ''ہم ہجومی تشدد کو نہیں روک سکتے، تاہم ملزمین کو سزا دلانے کی پوری کوشش کرتے ہیں۔''

اقلیتوں کے حقوق کے لیے اقلیتی کمیشن تو بنایا گیا لیکن اس کا فائدہ اقلیت کے لوگوں کو خاص طور پر مسلمانوں کو کم ہی مل پا رہا ہے۔ ایسے میں کمیشن کے رکن کا کہنا ہے کہ حکومت کی جانب سے متعدد فلاحی اسکیمز عمل میں لائی جا رہی ہے تاکہ اقلیت کے لوگوں کی پسماندگی کو دور کیا جا سکے۔

کمیشن کے ممبر سے جب اقلیتوں پر ہجومی تشدد کے بارے میں بات کی تو ان کا کہنا تھا کہ اتنے بڑے ملک میں اس طرح کے واقعات کو روکنا مشکل ہے، پھر بھی وہ ملزمین کو سزا دلانے کی کوشش کرتے ہیں۔

واضح رہے کہ ملک میں اقلیتوں کے نام پر سبھی سیاسی جماعتیں ان کا ووٹ حاصل تو کرتی ہیں اور ان کے حقوق کے نام پر کمیشن بھی بنا دیے جاتے ہیں لیکن ان کی بدحالی کو آج بھی دور نہیں کیا جا سکا۔