باندہ: 200 کلو گرام منشیات ضبط، چار گرفتار

ریاست اترپردیش میں ایس ٹی ایف نے دو کوئنٹل گانجہ برآمد کرکے چار اسمگلروں کو سلاخوں کے پیچھے دھکیل دیا۔

اترپردیش پولیس کے اسپیشل ٹاسک فورس (ایس ٹی ایف) نے بین ریاستی منشیات اسمگلر گروہ کے چار ارکین کو گرفتار کر کے ان کے قبضے سے 200 کلو گرام گانجہ بر آمد کیا ہے۔ ضبط گانجے کی قیمت 45لاکھ روپئے بتائی جاتی ہے۔

ایس ٹی ایف ترجمان نے جمعرات کو بتایا کہ کافی دنوں سے بندیل کھنڈ کے مختلف اضلاع میں منشیات کی اسمگلنگ کرنے والے گروہ کے مستعد ہونے کی خبریں موصول ہو رہی تھیں۔ گروہ کو پکڑنے کے لئے ایس ٹی ایف دفتر میں واقع اینٹی ڈکیتی ٹیم کو لگایا گیا تھا۔ اس درمیان اطلاع ملی کہ منی ٹرک میں بھاری مقدار میں گانجہ باندہ لایا جا رہا ہے۔

انہوں نے بتایا کہ اطلاع کی بنیاد پر موقع پر پہنچی ٹیم نے ٹرک سوار چار اسمگلروں - شیوا دت، راجیش، رام ملن اور شمس الدین - کو گرفتار کر کے ان کے قبضے سے 200کلو گرام گانجہ اور 4 موبائل بر آمد کئے ہیں۔

ترجمان نے مزید بتایا کہ پوچھ گچھ میں ملزمین نے بتایا کہ یہ لوگ لمبے عرصے سے اس کاروبار سے وابستہ ہیں اور اڑیسہ سے کم قیمتوں میں گانجہ خرید کر چترکوٹ ڈویژن کے اضلاع میں اچھے داموں فروخت کرتے ہیں۔