ریاست اترپردیش کے ضلع اناؤ کے بہار علاقے میں عصمت دری کی متأثرہ کو زندہ جلا دینے کے واقعہ میں جانچ کے بعد پولیس ملزموں کے خلاف چارج شیٹ داخل کرنے کی تیاری میں ہے۔
پولیس جلد ہی عدالت میں چارج شیٹ فائل کرسکتی ہے۔ گذشتہ پانچ دسمبر کو بہار علاقے میں عصمت دری کے ملزموں نے متأثرہ پر پٹرول ڈال کر آگ لگا دیا تھا جب وہ رائے بریلی اپنے وکیل سے ملنے جا رہی تھی۔
دوران علاج متأثرہ زخموں کی تاب نہ لاسکی اور دہلی کے صفدر گنج اسپتال میں اس کا انتقال ہوگیا تھا۔
ایس پی وکرانت ویر نے بتایا کہ اس معاملے میں پانچ دسمبر کو ایف آئی آر درج کی گئی تھی۔ جس کی جانچ تشکیل شدہ ایس آئی ٹی ٹیم کررہی تھی۔
ٹیم نے چانچ کر کے چارج شیٹ تیار کرلی ہے۔ عدالت کی اس وقت چھٹی چل رہی ہے، کھلتے ہی چارج شیٹ داخل کردی جائےگی۔
انہوں نے بتایا کہ گرفتار سبھی ملزمین کے خلاف جانچ کے دوران وافر ثبوت ملے ہیں۔اس معاملے میں حکومت کی ہدایت پر جانچ کے لئے تشکیل شدہ ایس آئی ٹی نے معاملے میں گرفتار کر کے جیل بھیجے گئے پانچوں ملزمین سے 18 دسمبر کو 12 گھنٹے کی ریمانڈ پر لے کر پوچھ گچھ کی تھی۔
مزید پڑھیں: سی اے اے مخالف مظاہرے کے دوران 110 افراد کو نوٹس
قابل ذکر ہے کہ متأثرہ نے زخمی حالت میں پولیس کو بیان دیتے ہوئے عصمت دری کے ملزمین شیوم ترویدی اور شبھم ترویدی کے ساتھ ہی ہری شنکر ترویدی، رام کشور ترویدی اور امیش واجپئی پر آگ لگانے کا الزام لگایا تھا۔
