ڈرائیورز کے لیے مناسب سہولیات کا مطالبہ

ریاست اترپردیش کے دارالحکومت لکھنئو میں ٹرانسپورٹ کمشنر دھیرج ساہو نے بتایا کہ ٹرک اور دیگربڑی گاڑیوں سے سامان ڈھونے والے ڈرائیورز اور آپریٹرز کی سہولیات کے لیے قومی شاہراہوں اور ریاستی شاہراہوں پر ڈھابے اور ورکشاپ کھولنے کی ہدایات جاری کی گئی ہیں۔

ٹرانسپورٹ کمشنر دھیرج ساہو نے بتایا کہ لاک ڈاؤن کے پیش نظر گذشتہ دن ریاستی حکومت نے ضلعی کلکٹرز کو یہ ہدایت کی تھی کہ وہ کچھ اضلاع میں ڈھابوں ورکشاپس کے لیے جگہ کا تعین کریں تاکہ ڈرائیورز، آپریٹرز کی سہولیات پر بھی غور کیا جا سکے۔

آپ کو بتادیں کہ اس حکم نامے کے بعد تمام ضلعی کلکٹرز کو قومی شاہراہوں اور ریاستی شاہراہوں پرضرورت کے مطابق ڈھابوں اور ورکشاپس کی نشاندہی کرنے کی ہدایت جاری کردی گئی ہیں۔

اس کے علاوہ ٹرانسپورٹ کمشنر نے کہا کہ 23 مارچ سے لاک ڈاؤن نافذ ہونے کی وجہ سے آر ٹی او آفس بند کردیئے گئے تھے۔ اس کے سبب جو گاڑی مالکان 30 دنوں کے اندر رجسٹریشن حاصل نہیں کر سکیں ہیں انہیں یہ سہولت دی گئی ہے کہ وہ نیلامی کے ذریعے رجسٹریشن نمبر حاصل کر سکیں گے۔

واضح رہے کہ اس کے تحت اب گاڑی مالکان اپنی پسندیدہ رجسٹریشن نمبر 30 دن کے اندر گاڑی جمع کروا کر حاصل کر سکیں گے۔