ریاست اتر پردیش کے ضلع بارہ بنکی میں گذشتہ دنوں قتل کے بعد کھیت میں پھینکی گئی لڑکی کی لاش کے قاتلوں کو ڈھونڈھنے میں پولیس اب تک ناکام ہے۔ جمعرات کو مقتولہ کے اہل خانہ سے رکن پارلیمان اوپیندر راوت نے ملاقات کی تھی، جس کے بعد انہوں نے متاثرہ کنبے کو یہ یقین دہانی کرائی تھی کہ ملزمان کے خلاف سخت کاروائی کی جائے گی اور متاثرہ کے اہل خانہ کو انصاف دلایا جائے گا۔ واردات کے پانچویں دن بھی پولیس کو اس معاملے میں کوئی کامیابی حاصل نہیں ہوئی ہے۔
واضح رہےکہ گذشتہ اتوار کو زیدپور تھانہ حلقہ کے بی بی پور گاؤں میں سرسوں کے کھیت سے 22 سالہ دلت لڑکی کی لاش برآمد ہوئی تھی۔ جس کی شناخت کوٹھی تھانہ حلقے کے کورہرا پوروا گاؤں کی رہنے والی لڑکی کے طور پر ہوئی تھی۔ لاش ملنے کے بعد لڑکی کے تعلق سے یہ قیاس لگایا جارہا ہے کہ لڑکی کے ساتھ اجتماعی جنسی زیادتی کی گئی تھی اور پھر لڑکی کا گلا گھونٹ کر قتل کیا گیا تھا۔