سی اے اے کے خلاف پرتشدد مظاہرہ، اترپردیش میں چھ ہلاک، 50 سے زیادہ زخمی

شہریت ترمیمی قانون (سی اے اے) اور قومی شہریت قانون (این آر سی) کے خلاف قومی دارالحکومت دہلی سمیت ملک کے مختلف مقامات پر مظاہرے جاری ہیں جبکہ اترپردیش میں ہوئے تشدد میں چھ افراد کی موت ہوگئی اور 38 پولس اہلکاروں سمیت 50 سے زیادہ لوگ زخی ہوگئے۔

دہلی میں جمنا پار سیماپوری علاقے میں مظاہرین کے دوران پرتشدد بھیڑ تشدد پر اترآئی۔ اس دوران پتھراؤ میں ایک پولس افسر معمولی طور سے زخمی ہوگئے۔ جعفرآباد، سیلم پور میں بھی بڑی تعداد میں لوگوں نے مظاہرہ کیا۔

پرانی دہلی کی جامع مسجد کے نزدیک جمعہ کی نماز کے وقت بھیم آرمی کے علاوہ دیگر لوگوں نےبھی زبردست مظاہرہ کیا۔ یہاں پولس نے زبردست سلامتی کا انتظام کیا تھا اور شناختی کارڈوں کی جانچ کے بعد لوگوں کو جامع مسجد میں نماز کےلئے جانے دیا گیا۔

جمعہ کی نماز کے بعد بڑی تعددا میں مظاہرین بڑی تعداد میں مظاہرین دہلی گیٹ کے نزدیک پہنچ گئے اور حکومت کے خلاف نعرے بازی کرنے لگے۔ یہ سلسلہ گھنٹوں جاری رہا۔ اس دوران ایک گاڑی میں بھی آگ لگادی گئی۔ پولس نے لوگوں کو منتشر کرنے کے لئے پانی کے بوچھاڑیں چھوڑیں لیکن بڑی تعداد میں لوگ اب بھی دریاگنج میں جمع ہیں۔