مراد آباد: اساتذہ کے مسائل کو حل کرنے کا مطالبہ

بھارتیہ گرامین ودیالیہ سمیتی نے اترپردیش کے وزیر اعلیٰ یوگی آدتیہ ناتھ سے مدرسے اور نجی اسکولز کے اساتذہ کے مسائل کو حل کرنے کا مطالبہ کیا ہے جو لاک ڈاون کی وجہ سے سخت مشکلات سے دو چار ہیں۔

بھارتیہ گرامین ودیالیہ سمیتی کے جنرل سیکریٹری عارف پاشا نے ایک پریس کانفرنس کے دوران بتایا کہ ملک میں لاک ڈاون کے نفاذ کے بعد سے ابھی تک تمام تعلیمی ادارے بند ہیں۔

انہوں نے بتایا کہ لاک ڈاون کے سبب ریاستی حکومت کی جانب سے اساتذہ کو ہر مہینے کی تنخواہ دی جارہی ہے لیکن آخر کار وہ اساتذہ کہاں جائیں اور ان کو تنخواہ کون دے گا جو اسکول کمیٹی، سمیتی اور تعلیمی ادارے چلا رہے ہیں۔

انہوں نے کہا کہ اسکول بند ہے بچوں کی فیس نہیں مل رہی ہے۔ ایسے اساتذہ کے لیے ریاستی حکومت کو کوئی منصوبہ بنانا چاہئے جس سے کہ گھر بیٹھے پرائیویٹ اسکول کو کچھ اعزازی رقم مل جائے اور ان کے گھر کا خرچ چل سکے۔

انہوں نے کہا کہ اگر بات کریں مدرسوں کی تو ریاست اترپردیش کے مراد آباد میں تقریباً گیارہ سو مدرسے ہیں۔ ان مدرسوں میں جو جدید تعلیمی مدرسے کے تحت آتے ہیں، ان مدرسوں کے اساتذہ کو بھی کئی مہینوں سے اعزازی رقم نہیں ملی ہے۔

انہوں نے کہا کہ ان مدرسوں کے اساتذہ کہاں جائیں جو جدید تعلیمی مدرسے کے تحت بھی نہیں آتے اور حکومت کی جانب سے مدرسوں کے اساتذہ کو کوئی تنخواہ بھی نہیں دی جاتی۔

مدرسوں کے اساتذہ اور پرائیویٹ کمیٹی کے اسکولز کے اساتذہ کی تنخواہ کے سلسلے میں بھارتیہ گرامین ودیالیہ سمیتی نے وزیر اعلیٰ یوگی آدتیہ ناتھ کو ایک میمورنڈم بھیجا ہے۔