ریاست اترپردیش کے بارہ بنکی میں سماجی تنظیم دیش پریمی ایکتا منچ کی جانب سے میڈکل کیمپ کا اہتمام کیا گیا جس کا مقصد کووڈ 19 کے دور میں تنگ دستی اور پریشان افراد کو بہتر طبی خدمات فراہم کرانا ہے۔
کیمپ میں لوگوں کی مفت جانچ کے ساتھ مفت علاج اور کم سے کم ایک ہفتہ کی مفت دوا بھی مریضوں کو دی گئی۔
واضح رہے کہ دیش پریمی ایکتا تنظیم سماجی کاموں میں مسلسل سرگرم رہنے والی تنظیم ہے اور یہ تنظیم گزشتہ کئی برسوں سے اس قسم کے میڈیکل کیمپ منعقد کراتی رہی ہے۔
اتوار کے میڈیکل کیمپ میں آرتھوڈوکس، پیڈاٹکس سمیت متعدد ڈاکٹرز نے مریضوں کی جانچ کرکے انہیں مفت میں دوائیں بھی تقسیم کیں۔
دیش پریمی ایکتا منچ کے صدر طاہر خان نے بتایا کہ تنظیم طویل عرصے سے اس قسم کے میڈیکل کیمپ کا اہتمام کراتی رہی ہے لیکن اس کیمپ کا اصل مقصد یہ ہے کہ کووڈ 19 کی وجہ سے پریشان افراد کو بہتر طبی خدمات مہیا کرائی جائے کیونکہ لاک ڈاؤن کی وجہ سے کافی لوگ تنگ دستی کی وجہ سے پریشان ہیں۔
انہوں نے بتایا کہ میڈیکل کیمپ میں تمام جانچ مفت ہوتی ہیں اور ان کی کوشش ہے کہ کم سے کم ایک ہفتے کی دوا بھی انہیں مفت میں ہی فراہم کی جائے۔