بارہ بنکی: پردھان منتری غریب کلیان یوجنا کے تحت مستحقین کو راشن تقسیم

ریاست کے تمام اضلاع کی طرح بارہ بنکی میں بھی جمعرات کے روز پردھان منتری غریب کلیان ان اسکیم کے تحت 'ان مہوتسو' جوش و خروش کے ساتھ منایا گیا۔ اس موقع ضلع کی تمام سرکاری راشن کی دوکانوں پر ٹیلی ویزن لگاکر وزیراعظم نریندر مودی کا خطاب تمام مستفدین کو سنایا گیا۔ بعد میں ایک خاص تھیلے میں تمام مستفدین کو 5 کلو فی یونٹ کے حساب سے راشن تقسیم کیا گیا۔

بارہ بنکی کے گاندھی آشرم میں واقع سرکاری راشن کی دوکان پر ان مہوتسو کے لئے خاص تقریب کا اہتمام کیا گیا، جس میں ضلع کے وزیر انچارج دارہ سنگھ چوہان نے شرکت کی۔

وزیراعلیٰ اور وزیراعظم کے خطاب کے بعد ریاستی وزیر دارہ سنگھ چوہان نے 5 مستحق افراد کو راشن کا جھولا تقسیم کیا۔

اس موقع پر انہوں نے کہا کہ کووڈ۔19 کے دور میں پریشان عوام کی ریاستی اور مرکزی حکومت ہر قسم سے مدد کر رہی ہے۔

انہوں نے کہا کہ حکومت کی کوشش ہے کہ کوئی بھی شخص کسی بھی وجہ سے بھوکا نہ سوئے۔ اسلئے وزیراعظم غریب بہبود اسکیم کے تحت نومبر تک مفت راشن تقسیم کر رہے ہیں۔

اپوزیشن کے الزامات کے سوال پر انہوں نے کہا کہ اپوزیشن کا کام ہے مخالفت کرنا ہے اور حکومت کا کام ہے عوام کے فلاح و بہبود کے لیے کام کرنا ہے اور وہ کام ہم بخوبی کر رہے ہیں۔