بریلی میں کتابوں کی دکانیں کھولنے کا حکومت کا حکم

اتر پردیش حکومت نے کتاب کی دکانوں کو کھولنے کا حکم دیا ہے، بریلی کے میئر اُمیش گوتم نے کتابوں کی مارکیٹ میں سینی ٹائز کرایا اور لوگوں سے معاشرتی فاصلہ برقرار رکھنے کی اپیل کی۔

اتر پردیش کے دیگر اضلاع کی طرز پر بریلی میں بھی کتاب فروش اب دکانوں سے کتابیں فروخت کرسکیں گے لاک ڈاؤن قوانین میں نرمی کے بعد ڈی ایم کی ہدایت پر ڈی آئی او ایس کی جانب سے یہ حکم جاری کیا گیا ہے۔

ڈی آئی او ایس کے مطابق کتاب فروش معاشرتی فاصلے کی پیروی کریں گے اور چھ فٹ کے فاصلے پر دائرے قائم کرکے نصاب کی کتابیں فروخت کریں گے، طلبہ کی ضرورت کے مطابق ہی کتابیں دی جائیں گی، کسی کو بھی مکمل سیٹ لینے پر مجبور نہیں کیا جائے گا۔

بریلی میں اس مسئلہ کے حل کے لیئے تمام کتاب فروش اور سرپرست غفلت کی حالت میں تھے کہ کتابوں کی ہوم ڈلیوری ہوگی یا پھر کتابوں کے لیئے غیر معینہ مدت انتظار کرنا ہوگا، لاک ڈاؤن کی وجہ سے اسکول بند ہیں، کتابوں کی دکانیں بند ہونے کی وجہ سے گھروں میں بچّوں کے تعلیمی سرگرمیوں کو جاری رکھنا مشکل ہو گیا تھا۔

دکان پر ہاتھ دھونے، سینی ٹائزیشن اور کتاب فراہمی کے وقت دکان پر ٹچ فری انتظامات پر خصوصی توجہ دی جائے گی، اگر کہیں بھی اس حکم کی تعمیل نہیں ہوئی تو سخت کارروائی کی جائے گی۔

ضلع انتظامیہ نے والدین کے مطالبے کے بعد سب سے پہلے ہوم ڈلیوری شروع کی ہے، ہوم ڈیلیوری میں بھی بہت پریشانیوں کا سامنا کرنا پڑرہا ہے، شراب کی دکانیں کھلنے کے بعد کتابوں کی دکانیں کھولنے کا دباؤ بھی بڑھتا جا رہا تھا، سوشل میڈیا پر بھی ایک مہم چلائی گئی۔

اس کے علاوہ کتاب فروشوں کے پاس نئے نصاب کو گودام سے لاکر دکان میں بھی رکھنے کا موقع مل گیا ہے، میئر اُمیش گوتم نے شہر کے تمام مقامات بلخصوص کتاب گھروں کے آس پاس کے علاقوں کو سینی ٹائز کرایا۔