آسام کے درنگ ضلع میں پولس اور مقامی بنگالی مسلمانوں کے درمیان زمین خالی کرانے کے دوران تصادم کے دوران پولس کی گولیوں سے تین بنگالی مسلمانوں کی موت کے خلاف پورے ملک میں غم و غصے کا اظہار کیا جا رہا ہے اور آسام کی بی جے پی حکومت کی مذمت کی جا رہی ہے۔
کولکاتا کے آسام بھون کے سامنے ملی و سماجی تنظیموں کا احتجاج آسام میں پیش آئے اس واقعہ کے خلاف آج کولکاتا میں آسام بھون کے سامنے مختلف ملی و سماجی تنظیموں نے احتجاج کیا اور کچھ دیر تک سڑک بھی جام کئے رکھا۔
آسام بھون کے سامنے آج کولکاتا کی ملی و سماجی تنظیموں جن میں ایس آئی او، ایس ڈی پی آئی، ویلفئیر پارٹی آف انڈیا، اے پی سی آر، آل بنگال مائنوریٹی یوتھ فیڈریشن شامل تھے۔
اس موقع پر معروف سماجی رہنما سجاتا بھدرا نے کہا کہ آسام میں پولس کی گولی سے تین لوگوں کے قتل کے خلاف احتجاج کرنے کے لئے ہم یہاں جمع ہوئے ہیں۔ ہم اس واقعے کی مذمت کرتے ہیں اور حکومت نے جس طرح پولس کارروائی کی حمایت کی ہے ہم اس کی مذمت کرتے ہیں۔
آسام حکومت این آر سی کے ذریعے اپنے مقاصد میں کامیاب نہیں ہو سکی تو اس نے اب ایک نیا طریقہ کار اپنایا ہے ایک خاص مذہب کے لوگوں کو اس طرح سے خوف زدہ کرنے کی کوشش کی جا رہی ہے، انسانی حقوق پامال کئے جا رہے ہیں۔
ملی و سماجی تنظیموں کا احتجاج آل بنگال مائنوریٹی یوتھ فیڈریشن کے جنرل سیکریٹری قمرالزماں نے کہا کہ جس طرح سے آسام میں تین بنگالی مسلمانوں کو محض اس لئے گولیوں سے مار کر قتل کیا گیا کیونکہ وہ بنگالی تھے، ہم اس کی مذمت کرتے ہیں اور آسام حکومت اور پولس کے خلاف کارروائی کا مطالبہ کر رہے ہیں ۔اس کے علاوہ ہم مغربی بنگال کی حکومت سے مطالبہ کرتے ہیں کہ وہ آسام حکومت کی اس ظالمانہ عمل کے خلاف آواز اٹھائے۔
یہ بھی پڑھیں: Cyclone Gulab: مغربی بنگال میں یاس کے بعد اب گلاب طوفان کا خطرہ
ایس آئی او کے ریاستی جنرل سیکریٹری محمد عمران نے کہا کہ ہم آسام میں پیش آئے واقعے کے خلاف جس میں تین لوگوں کو زمین خالی کرانے کے نام پر مار دیا گیا ہم اس کے خلاف احتجاج کرنے کے لئے یہاں آسام بھون کے سامنے جمع ہوئے ہیں اور ہم مطالبہ کرتے ہیں کہ وہاں کے مسلم و دلتوں کے جان و مال کی تحفظ کو یقینی بنائی جائے اور جو بھی اس معاملے میں ملوث ہیں ان کے خلاف کارروائی کی جائے۔
