انوراگ ٹھاکر کو سیاہ جھنڈا دکھایا گیا

سورو گنگولی کی عیادت کے لیے ہسپتال جارہے بی سی سی آئی کے سابق صدر اور موجودہ وزیر انوراگ ٹھاکر کو بائیں محاذ کے حامیوں نے سیاہ جھنڈا دکھایا، لیکن وہ ان سب کی پرواہ کیے بغیر گانگولی سے ملنے ہسپتال پہنچے۔

ریاست مغربی بنگال کے وزیر برائے مملکت انو راگ ٹھاکر کو بی سی سی آئی کے صدر سورو گنگولی کی عیادت کے لئے ہسپتال جانے کے دوران بائیں محاذ کے حامیوں کی مخالفت کا سامنا کرنا پڑا۔ بائیں محاذ کے سینکڑوں حامیوں نے بی سی سی آئی کے سابق صدر انوراگ ٹھاکر کو سورو گنگولی کی عیادت کے لئے ہسپتال جانے کے دوران سیاہ جھنڈا دکھایا۔

بائیں محاذ کے حامیوں نے بی جے پی کی قیادت والی مرکزی حکومت کے خلاف نعرہ بازی بھی کی۔ مظاہرین زرعی قوانین کے خلاف احتجاج کر رہے تھے۔ وزیر برائے مملکت انو راگ ٹھاکر ان سبھوں کی پرواہ کئے بغیر سورو گنگولی کی عیادت کے لئے ہسپتال پہنچے۔

نامہ نگاروں سے گفتگو کرتے ہوئے انوراگ ٹھاکر نے کہا کہ' دادا فائٹر ہیں۔انہوں نے اپنی زندگی میں نہ جانے کتنی بار اتار چڑھاؤ کا سامنا کیا۔ انہوں نے ہر چیلنج کا سامنا کیا اور اس پر کامیابی بھی حاصل کی۔ وہ بہت جلد صحتیاب ہو کر ہم سب کے درمیان آییں گے۔ انوراگ ٹھاکر نے کہا کہ' میں دادا کو بیس برسوں سے جانتا ہوں۔ وہ ایک کامیاب کرکٹر ہونے کے ساتھ ساتھ ایک کامیاب منتظمین بھی ہیں۔

انہوں نے مزید کہا کہ' دادا کو ابھی بہت کام کرنے باقی ہیں مزید انہیں بھارتی کرکٹ کو کامیابیوں کی بلندیوں تک لے جانا ہے'۔