تلنگانہ کے ضلع کھمم میں پولیس اور ماؤنوازوں کے درمیان فائرنگ کے تبادلہ میں ایک ماؤنواز ہلاک ہوگیا۔
ذرائع کے مطابق یہ واقعہ ضلع کے دیوالہ گوڑم جنگلاتی علاقہ میں کل شب پیش آیا۔ شبہ کیا جارہا ہے کہ مرنے والے ماونواز کا تعلق چھتیس گڑھ سے ہے۔ تاہم اس کی ہنوز شناخت نہیں ہو پائی ہے۔
ماؤنوازوں کی تلاش کے لئے شروع کئے گئے پولیس فورسز کے آپریشن کے بعد بیشتر نکسلائٹس فرار ہوگئے۔ ضلع میں حال ہی میں یہ دوسرا انکاؤنٹر ہے۔
ضلع کے مالے ٹونگا کے جنگلات میں 16جولائی کو فائرنگ کا تبادلہ ہوا تھا جس میں ایک کانسٹیبل زخمی ہوا تھا۔ اپنے بیان میں ضلع ایس پی سنیل دت نے کہا کہ ماونوازوں کی موجودگی کی اطلاع پر چھتیس گڑھ کی سرحد کے قریب پولیس کی ایکشن ٹیمیں گاڑیوں کی تلاشی لے رہی ہیں۔
انہوں نے کہا کہ جمعرات کی صبح کی اولین ساعتوں میں انسپکٹر پولیس سرینواس اور ان کی ٹیم نے دو افراد کو موٹر سائیکل پر مشتبہ انداز میں جاتا ہوا دیکھا۔ جب بائیک چلانے والے سے خواہش کی گئی کہ وہ گاڑی کو روکے تو وہ وہاں سے فرار ہونے لگے تاہم جاتے ہوئے انہوں نے ان کا تعاقب کرنے والی پولیس پر فائرنگ کردی۔ پولیس نے جوابی فائرنگ کی۔ بعد ازاں پولیس کو ایک 25 سالہ ماونواز لیڈر کی لاش ملی۔
اس کے پاس سے بندوق اور بائیک ضبط کی گئی۔ بتایاجاتا ہے کہ اس کی شناخت چھتیس گڑھ کے دوالوڈو گاوں کے رہنے والے 25 سالہ شنکر کے طور پر کی گئی ہے۔ وہ ماونواز لیڈر ہری بھوشن کا گارڈ تھا۔