'اتحاد اور جدوجہد سے مسلمان مضبوط ہوسکتے ہیں'
تلنگانہ کے ضلع کریم نگر میں مجلس اتحاد المسلمین کے بانی صدر عبدالواحد اویسی کی یاد میں جلسہ عام منعقد کیا گیا۔ جسمیں عوام نے کثیر تعداد میں شرکت کی۔
اس موقع پر مجلس کےرہنما اکبرادین اویسی نے تقریب سے خطاب کرتے ہوئے کہا کہ مرحوم صدر نے مجلس اتحادالمسلمین جماعت کا احیا اس وقت کیا جب حیدرآباد دکن میں پولیس ایکشن ہوا جسمیں ہزاروں مسلمان شہید ہوگئے تھے اور ہر طرف خوف ودہشت کا عالم تھا۔
اس موقع پر انھوں نے ملک میں ہورہے ہجومی تشدد کے واقعات کا ذکر کرتے ہوئے کہا کہ اگر دشمن ہم سے طاقت کی زور پر کوئی نعرہ لگوانا چاہتا ہے تو ہمیں ایسا نعرہ ہرگز نہیں لگانا چاہئے اور نامساعد حالات ہوں تو اللہ کو یاد کرتے ہوئے کلمہ طیبہ کا ورد کرنا چاہئے۔
انھوں نے کہا کہ موجودہ حالات میں مسلمان ڈرا اور سہما ہوا ہے جو کمزور ایمان کی علامت ہے۔
انھوں نے کہا کہ ڈرنےاور گھبرانے کی ضرورت نہیں ہے کیونکہ ہم اُس رسول کے امتی ہیں جن کے امتی ہونے کی انبیا خواہش رکھتےتھے۔
اکبر اویسی نے کہا کہ بابر سے لیکر نظام دکن تک اقتدار پر ہمارا قبضہ تھا کیونکہ ہمیں صرف اللہ کا خوف تھا اور ہم دنیا کے طاقتوں کے سامنے جھکتے نہیں تھے۔
اس موقع پر مجلسی ارکان اسمبلی سید احمد پاشا قادری،کوثر محی الدین ممتاز احمد خان جعفر حسین معراج نے بھی خطاب کیا اور مرحوم صدر عبدالواحد اویسی کو خراج عقیدت پیش کیا۔