کانپور: محمد علی پارک میں 45 دنوں سے مسلسل احتجاج

شہریت ترمیمی قانون کے خلاف اترپردیش کے ضلع کانپور کے محمد علی پارک میں گزشتہ 45 دنوں سے لوگ مسلسل دھرنے پر بیٹھے ہیں۔

محمد علی پارک میں بیٹھی خواتین کے لیے ہر دن اس امید سے گزر رہا کہ شاید آج حکومت کا کوئی نمائندہ ان کی بات سننے آئے گا اور ان کے تئیں کوئی مناسب فیصلہ لیا جائے۔

کانپور کے چمن گنج علاقہ میں واقع محمد علی پارک میں چل رہے اس دھرنے میں لکھنئو سے عظمیٰ پروین عرف جھانسی کی رانی اپنی ٹیم کے ساتھ پہنچی، جہاں انہوں نے خاتون مظاہرین سے خطاب بھی کیا اور ان کے عزم و حوصلہ کو مزید تقویت بخشنے کے لیے حب الوطنی کے نعرے بھی لگوائے۔

واضح رہے کہ گذشتہ دنوں لکھنئو کے گھنٹہ گھر علاقے میں اس متنازع قانون کی مخالفت کرتے ہوئے دھرنے پر بیٹھنے والی خواتین میں عظمیٰ پروین بھی تھیں، اپنے معصوم بچہ کو پیٹھ پر باندھ کر انہوں نے زبردست انداز میں اتر پردیش پولیس کے مبینہ تشدد کے خلاف آوازیں بلند کی تھیں، ان کے اس کارنامے اور بے باکانہ انداز کے بعد خاص طور پر انہیں عظمیٰ پروین عرف جھانسی کی رانی کے نام سے پکارا جا رہا ہے۔