کانپور: کورونا گائیڈ لائن پر عمل کرتے ہوئے مدارس و مکاتب میں تعلیم کا سلسلہ جاری

ڈیڑھ سال کے بعد کانپور میں تمام مدارس عربیہ اور مکاتب میں تعلیمی سلسلے کا آغاز ہوگیا ہے۔ حکومت کی جانب سے جاری کی گئی تمام گائیڈ لائن پر عمل کرتے ہوئے طلبہ کو تعلیم دی جانے لگی ہے۔

کانپور میں تقریباً ڈیڑھ سو سے زائد چھوٹے بڑے مدارس و مکاتب ہیں، جہاں دینی تعلیم بچوں کو دی جاتی ہے۔ یہ تمام مدارس و مکاتب ڈیڑھ سال پہلے 22 مارچ 2020 کو کووڈ۔19 وبا کی وجہ سے بند کر دیے گئے تھے، لیکن کورونا کیسز میں کمی آنے پر حکومت کی طرف سے اجازت ملنے کے بعد اب مدارس عربیہ میں تعلیمی سلسلہ شروع ہو گیا ہے۔

مدارس میں دو شفٹ میں آدھی آدھی تعداد میں بچوں کو تعلیم دی جا رہی ہے۔ فی الحال مدارس میں بچوں کی تعداد کم ہے۔

کووڈ۔19 وبا کا خوف ابھی بھی اتنا ہے کہ تمام طلبہ کے والدین ابھی بھی اس وبا سے خوفزدہ ہیں۔ مدارس ومکاتب ضرور کھل گئے ہیں، لیکن دوسرے اضلاع سے آنے والے بچے ابھی بھی مدارس میں پڑھنے نہیں آرہے ہیں۔ سرپرست اس وبا کے خوف کی وجہ سے ابھی بھی اپنے بچوں کو مدارس نہیں بھیج رہے ہیں۔