کانپور: شیلٹر ہوم میں 57 لڑکیاں کورونا پازیٹیو

سبھی 57 لڑکیوں کو ہسپتال میں داخل کرایا گیا ہے۔جن لوگوں کو کورونا کے علامت نظر نہیں آئے ہیں انہیں قرنطینہ کیا گیا ہے اور پوری بلڈنگ کو سیل کر دیا گیا ہے۔

ریاست اتر پردیش کے ضلع کانپور میں ریاستی حکومت کی جانب سے چلائے جا رہے شیلٹر ہوم میں رہنے والی 57 لڑکیاں کورونا مثبت پائی گئی ہیں۔

کانپور میں گزشتہ کئی روز سے کورونا متاثر مریضوں کی تعداد میں اضافہ دیکھنے کو ملا ہے، وہیں اب اس ادارے کو کووڈ کلسٹر کہا جا رہا ہے۔ سبھی 57 لڑکیوں کو ہسپتال میں داخل کرایا گیا ہے۔ یہاں جن لوگوں کو کورونا کے علامت نظر نہیں آئے ہیں انہیں قرنطینہ کیا گیا ہے اور پوری بلڈنگ کو سیل کر دیا گیا ہے۔

اتوار کے روز اس معاملے نے اس وقت اور زور پکڑ لیا جب مقامی میڈیا نے دعویٰ کیا کہ ان لڑکیوں میں سے دو حاملہ ہیں۔ جس کے بعد اس شیلٹر ہوم پر سوال اٹھنے لگے ہیں۔ دیر رات ضلع مجسٹریٹ برہمدیو رام تواری نے اس کی تصدیق کرتے ہوئے بتایا کہ حاملہ پائی گئی پانچ لڑکیاں کووڈ-19 سے متاثر پائی گئی ہیں۔