جموں و کشمیر انتظامیہ نے حال میں منتخب ہوئے ضلع ترقیاتی کونسل کے چیئرپرسن، نائب چیئرپرسن اور اراکین کے وارنٹ آف پریسیڈنس جاری کرتے ہوئے ان کی تنخواہیں بھی کل مقرر کی تھیں جبکہ آج انتظامیہ نے ان کے لیے جموں کے کنونشن سینٹر میں ٹرینگ پروگرام کا اہتمام کیا تھا۔
اس کنونشن سینٹر میں لیفٹنٹ گورنر منوج سنہا کی موجودگی بھی متوقع تھی تاہم ضلع ترقیاتی کونسل کے چیئرپرسن، نائب چیئرپرسن اور تمام اراکین نے کنونشن سینٹر کے اندر داخل ہونے سے انکار کرکے گورنر انتظامیہ کے خلاف شدید احتجاج کیا۔
کولگام کے ضلع ترقیاتی کونسل کے چیئرپرسن، محمد افضل نے احتجاج کے دوران ای ٹی وی بھارت کے ساتھ بات کرتے ہوئے کہا کہ انہوں نے بہت مشکل حالات میں انتخابات میں شمولیت اختیار کرکے جیت حاصل کی تاہم سرکار اب جمہوری اداروں کو مضبوط بنانے کے بجائے کمزور کرنا چاہتی ہے۔
انہوں نے سرکار سے مطالبہ کیا کہ ڈی ڈی سی انتخابات میں کامیاب ہوئے امیدواروں کو منسٹر آف سٹیٹ کا درجہ دیا جائے، انہوں نے کہا کہ سرکار نے جس طرح سے وعدہ کیا تھا اسے وعدے کو پورا کرنا چاہیے۔