کشتواڑ: سڑک کی خستہ حالی سے عوام پریشان

ضلع کشتواڑ کے ہڈیال لنک روڈ کی خستہ حالی سے راہ گیر کافی پریشان ہیں۔ انہوں نے انتظامیہ سے اپیل کی ہے کہ 'سڑک کی جلد از جلد مرمت کی جائے۔'

جموں و کشمیر کے ضلع کشتواڑ کے ہڈیال جل شکتی سے لے کر پولیس لائن جانے والی سڑک کی خستہ حالی سے مقامی لوگوں میں ناراضگی ہے۔

ہڈیال کے مقامی لوگوں نے بتایا کہ 'جل شکتی چیف ایگزیکٹیو انجینیئر کے دفتر سے لےکر شیو مندر موڑ ہڈیال جانے والی سڑک کی خستہ حالی سے معمولی بارش کے بعد گندہ پانی لوگوں کے گھروں میں چلا جاتا ہے جس کی وجہ سے انہیں کافی مشکلات کا سامنا کرنا پڑتا ہے۔'

لوگوں کا کہنا ہے کہ 'اس لنک روڈ پر نہ ہی ڈرین بنائی گئی ہے اور نہ ہی اس سڑک پر تارکول بچھایا جارہا ہے۔' اس تعلق سے مقامی لوگوں نے کہا کہ 'ضلع انتظامیہ کو کئی بار بتایا جاچکا ہے لیکن اس سلسلے میں ابھی تک کسی بھی قسم کی کوئی ٹھوس کارروائی نہیں ہوئی ہے۔'

وہیں مقامی دکانداروں کا کہنا ہے کہ 'انہوں نے متعدد مرتبہ ضلع انتظامیہ کو اس بارے میں شکایت کی ہے لیکن کسی طرح کی کوئی کارروائی نہیں ہورہی ہے۔'

ہڈیال کے لوگوں نے ڈپٹی کمشنر کشتواڑ اشوک شرما سے مطالبہ کیا کہ اس سڑک کی مرمت کے ساتھ ساتھ ڈرین بھی بنایا جائے تاکہ بارش کے موسم میں پریشانیوں کا سامنا نہ کرنا پڑے۔'