کورونا وائرس: جموں وکشمیر کی سرحدیں سیل

مرکز کے زیر انتظام کے علاقے جموں و کشمیر میں کورونا وائرس سے بچاؤ کے لیے احتیاطی اقدامات کیے جارہے ہیں۔

کورونا وائرس کے پھیلاﺅ کو روکنے کے اقدامات کو مزید مستحکم کرتے ہوئے جموں وکشمیر حکومت نے ایک اہم فیصلے کے تحت پنجاب، ہماچل پردیش اور لداخ یونین ٹریٹری کے ساتھ بین ریاستی سرحدوں کو مکمل طور سے بند کرنے کا فیصلہ لیا ہے۔ اسی طرح گاڑیوں کی بین ضلع نقل و حمل کو بھی ضرورت کے مطابق محدود کیا جائے گا۔

تاہم لازمی خدمات کے ساتھ وابستہ گاڑیاں معمول کے مطابق چلیں گی اور سری نگر – جموں قومی شاہراہ پر گاڑیوں کی نقل و حمل میں بھی معقولیت لائی جائے گی۔یہ فیصلہ پیر کے روز یہاں چیف سیکرٹری بی وی آر سبھرامنیم منعقدہ ایک اعلیٰ سطحی میٹنگ کے دوران لیا گیا۔ پرنسپل سیکرٹری داخلہ شالین کابرا، پرنسپل سیکرٹری مکانات و شہری ترقی دھیرج گپتا، پرنسپل سیکرٹری منصوبہ بندی، ترقی و اطلاعات روہت کنسل، ڈویژنل کمشنر جموں سنجیو ورما، آئی جی جموں زون مکیش سنگھ، سیکرٹری پی ڈی ڈی ایم راجیو، سیکرٹری ڈی ایم آر آر سمرن دیپ سنگھ اور کئی دیگر اعلیٰ افسران میٹنگ میں موجو دتھے۔

ڈویژنل کمشنر کشمیر پی کے پولے، آئی جی پی کشمیر زون وجے کمار اور کشمیر صوبے کے کئی دیگر اعلیٰ افسروں نے ویڈیو کانفرنسنگ کے ذریعے میٹنگ میں شرکت کی۔

ان رپورٹوں کا سنجیدہ نوٹس لیتے ہوئے چیف سیکرٹری نے قاضی گنڈ اور لور منڈا کے داخلہ پوائنٹوں کے علاوہ دیگر داخلہ پوائنٹوں، ہوائی اڈوں اور بس اَڈوں پر سختی سے چیکنگ اور سکریننگ کرنے کی ہدایات جاری کیں۔جس میں کہا گیا کہ کچھ مسافر داخلہ پوائنٹوں پر سکریننگ اور سیلف ڈیکلریشن کے عمل سے جی چراتے ہیں یا وہ اپنی سفر سے متعلق غلط تفاصیل پیش کرتے ہیں۔

انہوں نے مزید کہا کہ دوسروں کے لئے خطرات پیدا کرنے والے لوگوں کے خلاف سخت کارروائی کی جانی چاہیے۔