’وقف بورڈ کو زکوٰۃ و خیرات کا صحیح استعمال کرنا چاہیے‘

وقف جائیداد سے متعلق نشر ہوئی خبر کے بعد راجستھان مسلم وقف بورڈ کے چیئرمین نے ’’وقف جائیداد کا بہتر خیال‘‘ رکھے جانے کا دعویٰ کیا۔

گزشتہ روز وقف جائیداد سے متعلق ای ٹی وی بھارت کی جانب سے نشر کی گئی خبر کے بعد راجستھان مسلم وقف بورڈ کے چیئرمین ڈاکٹر خانو خان بودھوالی نے ای ٹی وی بھارت سے خاص بات چیت کے دوران کہا کہ ’’ہماری جانب سے وقف جائیداد کا بہتر خیال رکھا جا رہا ہے۔‘‘

انہوں نے کہا کہ دارالحکومت جے پور کے کربلا علاقے کے مقامی رکن اسمبلی رفیق خان کی جانب سے حال ہی میں 25 لاکھ روپے کا بجٹ ریاست کے وزیر اعلیٰ اشوک گہلوت سے پاس کروایا گیا ہے، جسے وقف جائیداد کے تعمیر و مرمت کے لیے استعمال میں لایا جائے گا۔

انہوں نے کہا کہ ’’ہماری جانب سے پوری توجہ دی جا رہی ہے۔ وزیر اعلیٰ کی جانب سے وقف بورڈ کو بھی پانچ کروڑ روپے دیے گئے، جسے وقف جائیداد کو مزید خوبصورت بنانے کے لیے استعمال کیا جائے گا۔‘‘

وقف بورڈ کے چیئرمین نے وقف کمیٹی کے ذمہ داران سے مخاطب ہوکر کہا کہ ’’وقف بورڈ کا یہ فرض بنتا ہے کہ وہ زکوۃ و خیرات کے پیسے کو صحیح جگہ پر استعمال کریں۔‘‘

واضح رہے کہ گزشتہ روز ای ٹی وی بھارت کی جانب سے وقف بورڈ کی عدم توجہی کے سبب وقف جائیداد کی خستہ حالت سے متعلق ایک رپورٹ نشر کی گئی تھی۔