اندور: سنی ویلفیئر کمیٹی کی کوشش، مانگنے والے ہاتھ دینے والے بن جائیں

ریاست مدھیہ پردیش کے صنعتی شہر اندور کی تنظیم کی کوشش ہے کہ مانگنے والے ہاتھ کام کرنے والے بن جائیں اور کمانے والے ہاتھ دینے والے بن جائیں۔

عالمی وبا کورونا سے معیشت کو بڑا نقصان پہنچا ہے۔ ملک میں جہاں بے روزگاروں کی تعداد میں اضافہ ہوا ہے، وہیں چھوٹا کاروبار درہم برہم ہوگیا ہے۔

ہنرمند اور محنت کشوں کی مدد کرنے کے لئے مدھیہ پردیش کے شہر اندور کی تنظیم سنی ویلفیئر کمیٹی نے ایک شخص کی دوکان کھلوائی، جس سے ان کا گزر بسر ہوسکے۔ اس دوکان کا افتتاح تنظیم نے ہائی کورٹ کے وکیل مجیب خان کے ہاتھوں کروایا۔

اس موقع پر کمیٹی کے انیس قادری کا کہنا تھا کہ ہماری کوشش ہے کہ مانگنے والے ہاتھ کمانے والے بن جائیں اور کمانے والے ہاتھ دینے والے۔ ہم نے کیرانہ اور الیکٹرک کاموں کے ماہر ایک شخص کی دکان کا افتتاح کیا ہے۔ تنظیم ہر اس شخص کی مدد کرنے کو تیار ہے جو ہنرمند اور محنتی ہے۔