حیدرآباد: نرسنگھا نند سرسوتی کے خلاف سخت کاروائی کا مطالبہ

جامعہ نظامیہ کے فارغین کی تنظیم علماء نظامیہ حیدرآباد کے ذمہ داران نے شان رسالت میں گستاخی اور مسلمانوں کے مذہبی جذبات کو مجروح کرنے والے شخص نرسنگھا نند سرسوتی کے خلاف حکومت ہند سے سخت کاروائی کا مطالبہ کیا ہے۔

ریاست تلنگانہ کی عظیم دینی درسگاہ جامعہ نظامیہ کے فارغین کی تنظیم علماء نظامیہ حیدرآباد کے ذمہ داران نے نرسنگھا نند سرسوتی کی جانب سے پیغمبر حضرت محمد مصطفیٰﷺ کی شان اقدس میں گستاخی کرنے پر اپنے سخت غم وغصہ کا اظہار کیا۔

کامل جامعہ نظامیہ کے مولانا حافظ سید توفیق اللہ حسینی بخاری اور مولانا مفتی حافظ محمد خالد یافعی نقشبندی نے پریس کانفرنس سے خطاب کرتے ہوئے کہا کہ محبت اور امن والے مذھبِ اسلام کی تعلیمات پر عمل کرتے ہوئے مسلمان دیگر مذاھب کے پیشواؤں کو برا بھلا نہیں کہتے ہیں، اس وجہ سے دیگر مذاھب کے ماننے والوں پر بھی یہ ذمہ داری ہے کہ مذہب کے نام پر انتشار پھیلانے والوں کے خلاف آواز بلند کریں۔

علماء نظامیہ آرگنائزیشن حیدرآباد کے ذمہ داران نے حکومت ہند اور حکومت تلنگانہ سے مطالبہ کیا کہ وہ شان رسالت میں بے ادبی کرنے اور مسلمانوں کے مذہبی جذبات کو مجروح کرنے والے شخص کے خلاف سخت کاروائی کی جائے۔

اس موقع پر مولانا مفتی ڈاکٹر مرزا شفیع اللہ بیگ نظامی، مولانا حافظ فیروز نقشبندی اور مولانا حافظ شیخ زاہد حسین کے علاوہ دیگر علماء بھی موجود تھے۔