جمعہ کے روز ٹولی چوکی برج کے نیچے لوگ 2 بج کر تیس منٹ پر جمع ہونا شروع ہو جاتے ہیں اور پیٹ بھر کر کھانے کے بعد اپنے چہرے پر مسکراہٹ سجائے انہیں دعائیں دیتے چلے جاتے ہیں۔ ہر جمعہ کو تقریباً 800 سے 1000 لوگ محمد الیاس کے دسترخوان پر کھانا کھاتے ہیں۔
صبح سے کھانا پکانے کا کام شروع کیا جاتا ہے۔ جتنے بھی مقامی لوگ ہیں غریب لوگوں کو کھانا کھلانے میں الیاس کی مدد کرتے ہیں۔ محمد الیاس اپنے خرچ سے یہ انتظام کرتے ہیں۔ الیاس بھی ایک ملازم ہی ہیں لیکن وہ دوسروں کا پیٹ بھرنے اور بھوکوں کی دعائیں لینے کے لیے زیادہ جانے جاتے ہیں۔
گذشتہ دنوں ہی ایک رپورٹ شائع ہوئی تھی کہ بھارت ہنگر انڈیکس میں 102ویں مقام پر ہے۔ بھکمری اس ملک میں اس قدر ہے کہ ہر پانچواں شخص بھوکے پیٹ سوتا ہے۔ حکومت اس ضمن میں کیا کر رہی ہے اس کا تو محمد الیاس کو پتہ نہیں ہے وہ تو بس اس کوشش میں اپنی دن و رات گزارتے ہیں کہ ان کے قرب و جوار میں کوئی بھوکا نہ رہے اور کسی غریب کو خالی پیٹ سونا نہ پڑے۔