بی جے پی کے دور اقتدار میں خواتین خوفزدہ ہیں: نینا سنگھ

انڈری گاؤں میں ہری چنری چوپال پروگرام میں ڈبوالی سے رکن اسمبلی اور جے جے پی کی رہنما نینا سنگھ چوٹالہ نے کہا کہ ریاست ہریانہ میں جن نائک جنتا پارٹی کی حکومت بننے پر ہریانہ میں لڑکیوں کی تعلیم پہلی کلاس سے پی ایچ ڈی تک مفت فراہم کی جائے گی۔

نینا سنگھ چوٹالہ نے مزید کہا کہ خواتین کو خودمختار بنانے کے لیے ان کی آمدنی کو بڑھایا جائے گا، اور پینشن عمر 55 برس کی جائے گی۔

نینا سنگھ چوٹالہ آئندہ ہونے والے اسمبلی انتخابات کے لیے اپنے بیٹوں دشینت چوٹالہ اور دگ وجے چوٹالہ کیلئے انتخابی مہم 'ہری چنری چوپال' کا اہتمام ریاست بھر میں کررہی ہیں۔

اسی سلسلے میں نوح اسمبلی حلقے کے گاؤں انڈری میں اس پروگرام کا انعقاد ہوا۔ جس میں نینا سنگھ چوٹالہ نے خواتین سے اپیل کرتے ہوئے کہا کہ بی جے پی کے دور اقتدار میں خواتین ڈری اور سہمی ہوئی رہتی ہیں۔

انہوں نے کہا 'آج خواتین کو متحد ہونے کی ضرورت ہے۔ خود اپنی آواز اس قدر بلند کرنے کی ضرورت ہے کہ حکومت کی جڑیں ہل جائیں'۔