بدھ کے روز منعقدہ ضلع گیا میں نتیش کمار کی کابینہ کی میٹنگ میں فیصلہ لیا گیا ہے کہ ریاست بھر میں 74 خصوصی کل وقتی عدالتیں قائم کی جائیں گی۔ جہاں صرف شراب اور دیگر منشیات سے متعلق مقدمات کی سماعت ہوگی۔
داخلہ سکریٹری عامر سبحانی نے کابینہ کے اجلاس کے بعد اس سلسلے میں معلومات دی۔
انہوں نے بتایا کہ' اب تک ان مقدمات کی سماعت ایڈیشنل ڈسٹرکٹ اینڈ سیشن جج فرسٹ کی عدالت میں کی جارہی تھی۔ جس کی وجہ سے ممنوع شراب کے معاملے میں سماعت اور فیصلے میں تاخیر ہوتی تھی۔
لہذا ریاستی حکومت نے ہائی کورٹ کی رضامندی سے 74 خصوصی فل ٹائم اے ڈی جے سطح کی کورٹ بنانے کا فیصلہ کیا ہے، اس پرجلد ہی حتمی شکل دی جائے گی۔
خیال رہے کہ اگست، 2019 تک دو لاکھ سولہ ہزار شراب کے معاملے زیرسماعت ہیں، فیصلے میں تاخیر کی وجہ سے سزا میں تاخیر ہورہی ہے۔ اسی بنیاد پر عدالت تشکیل دی گئی ہے۔ مذکورہ عدالت کے لیے تقرری ہائی کورٹ کی ہدایات اور نگرانی پر ہوگی۔
واضح رہے کہ بہار میں شراب پر پابندی ہے۔ عدالت میں مقدمات کے بوجھ کی وجہ سے شراب معاملے میں سماعت اور سزا میں تاخیر ہونے سے شراب اسمگلنگر کو گرفتاری کے بعد ضمانت جلد ہی مل جاتی ہے، اور پھر وہ اسی غیر قانونی کام میں لگ جاتے ہیں۔ حکومت نے انہیں وجوہات کو دیکھ کر 74 کل وقتی عدالت کی تجویز کومنظوری دی ہے۔