بہار کے ضلع گیا میں آج دو بلاک میں پنچایت الیکشن کے تحت ووٹنگ ہورہی ہے۔ یہ دونوں بلاکس امام گنج اور ڈومریا نکسل سے متاثرہ علاقے ہیں، جہاں صبح سات بجے سے ووٹنگ شروع ہوگئی۔ ابھی تک کسی طرح کے کوئی ناخوشگوار واقعات کی اطلاع نہیں ہے۔
گیا میں آٹھویں مرحلے کے تحت کل 26 پنچایت حلقوں میں ووٹنگ ہوگی جس کے دونوں بلاکس میں تقریباً ڈھائی لاکھ ووٹرز ہیں۔
آج گیا میں پنچایت الیکشن اس لیے بھی زیادہ حساس ہے کیونکہ بھاکپا ماووادی کی طرف سے سہ روزہ بہار بندی کا آج دوسرا دن ہے نکسلیوں کی طرف سے پہلے ہی الیکشن کا بائیکاٹ کیا جاچکا ہے۔ تاہم ووٹرز بے خوف ہو کر ووٹنگ میں حصہ لے رہے ہیں۔
امام گنج گوریا بوتھس پر صبح سے ووٹروں کی لمبی قطاریں دیکھی گئی۔ اس دوران خواتین کی بڑی تعداد کو دیکھا گیا۔ بوتھ نمبر 25 اور 26 میں پہلی بار ووٹنگ ہوئی تاہم بوتھ پر بڑی تعداد میں لوگ نظر آئے۔ پہلی مرتبہ حق رائے دہی کا استعمال کرنے پہنچی ایشیکا اور پروین نے کہا کہ انکے گاؤں میں کئی ترقیاتی منصوبوں پر کام نہیں ہوئے ہیں۔ انہوں نے نئے منتخب امیدواروں کو علاقہ کی ترقی کےلیے کام کرنے کا مشورہ دیا۔
مزید پڑھیں:
ساتھ ہی ووٹروں نے کہا کہ انہیں کسی کا خوف نہیں ہے کیونکہ یہ انکی ترقی کا معاملہ ہے جب تک گاؤں دیہات ترقی نہیں کریں گے اس وقت تک ملک ترقی نہیں کرسکتا۔
واضح رہے کہ نکسل متاثر علاقے میں ووٹنگ کے پیش نظر ہر بوتھ پر سی سی ٹی وی کیمرے بھی لگائے گئے ہیں۔
