ریاست بہار کے ضلع گیا میں مرکزی حکومت کی دورخی اور جانبدارانہ پالیسی کے خلاف ایک کامیاب نشست علی میرج ہال نیو کریم گنج شہر گیا میں منعقد ہوئی۔
جس میں بنام کلمہ تمام مسالک کے علماء، مفتیان، مشائخ ائمہ اور شہر کے مسلم سماجی کارکنان، لکچررس، تجارت پیشہ حضرات، صحافیوں اور دانشوران نے شرکت کی۔
محض دو سے تین گھنٹے قبل قلیل مدتی اطلاع پر ایک جم غفیر کی موجودگی ان کے اندرونی جذبات اور درپیش مسلم مخالف مسائل کےتئیں حساسیت کی آئینہ دار رہی۔
میٹنگ میں مشترکہ طور پر یہ طے پایا کہ شہریت قانون ترمیمی بل جو گذشتہ دنوں لوک سبھا سے منظور کیا جا چکا ہے اور آج راجیہ سبھا میں پیش کیا جاچکا ہے، اس کی مخالفت میں اپنا احتجاج اور شدید ناراضگی کے اظہار کے لئے بروز جمعہ بتاریخ13-12-'2019 بعدنماز جمعہ گاندھی میدان گیا سے ایک زبردست احتجاجی جلوس نکالا جائے جس میں ہر کلمہ گو گھرانے کا ایک سے زیادہ لوگ شامل ہوں۔
یہ جلوس گیا کی مختلف مشہور شاہراہوں سے گذرتا ہوا ضلع مجسٹریٹ کے آفس( کلکٹریٹ) تک جائے گا۔ اور میمورنڈم پیش کرے گا۔
یہ جلوس جذبات مومنانہ سے بھر پور رہے گا مگر پر امن ہو گا۔ جلوس میں نعرہ کیا رہےگا۔ پلے کارڈز پر کیا تحریر ہوگا اور جلوس کن شاہراہوں سے گزرے گا اور اس مجلس کی آئندہ کیا قانونی اورسیاسی حکمت عملی رھے گی۔ اس کے لیگل سیل میں کتنے اور کون کون مسلم وکلا رہیں گے، جلوس کی قیادت اور نظم ونسق کی ذمہ داریاں کن حضرات کے سر رہیں گی اس کا جائزہ لیاگیا۔