نوئیڈا: گاڑی چور گروہ کے 3 ارکان گرفتار

اترپردیش کے نوئیڈا میں کوتوالی سیکٹر 20 پولیس نے چیکنگ کے دوران 3 شاطر چوروں کو گرفتار کیا ہے۔

نوئیڈا کے ضلع گوتم بدھ نگر میں پولیس کاروائی کے دوران گرفتار 3 چوروں کے قبضہ سے 8 موٹر سائیکلیں اور 4 کاریں برآمد کی گئیں۔ پولیس، گرفتار ملزمین کے دیگر ساتھیوں کی تلاش کررہی ہیں۔

اے ڈی سی پی نوئیڈا زون رنوجے سنگھ نے بتایا کہ کوتوالی سیکٹر 20 پولیس نے چیکنگ کے دوران 3 شاطر چوروں کو ڈی این ڈی فلائی اوور کے قریب سے گرفتار کیا ہے۔ ملزمان کی شناخت بھرت پور راجستھان کے رہنے والے انوپ شرما، راجیش متھرا اور عمران کی حیثیت سے کی گئی۔ پولیس نے ملزمین کے قبضہ سے 3 ہونڈا سٹی، ایک اسکارپیو، 7 بلٹ اور ایک سپلینڈر موٹر سائیکل کے علاوہ کئی چابیاں برآمد کرلی۔

پولیس نے بتایا کہ تینوں ملزمین ڈپلیکیٹ چابیوں کی مدد سے گاڑیوں کے لاک کھول کر چوری کیا کرتے تھے، جس کے بعد وہ ای سی ایم سسٹم، انجن اور چیسی نمبر، نمبر پلیٹ اور آر سی کو تبدیل کرکے صارفین کو فروخت کردیتے تھے لیکن بعض گاڑیاں گاڑیاں پرانی ہونے کی وجہ سے فروخت نہیں ہوپاتی تھیں لہذا وہ انہیں کباڑی کو بیچ دیتے تھے۔ پولیس اس گروہ میں ملوث دیگر چوروں کی تلاش کررہی ہے۔ پولیس نے بتایا کہ چوری کی گاڑیاں خریدنے والوں کو بھی بہت جلد گرفتار کیا جائے گا۔