صحافی کی گرفتاری پر راہل کا یوگی حکومت پر طنز

کانگریس صدر راہل گاندھی نے اترپردیش کے وزیراعلی یوگی آدتیہ ناتھ کے خلاف مبینہ طورپر قابل اعتراض تبصرہ کرنے والے صحافی کو گرفتار کئے جانے کی سخت تنقید کرتے ہوئے اسے فوراً رہا کرنے کا مطالبہ کیا ہے۔

راہل نے منگل کو اس گرفتاری کے سلسلے میں یوگی آدتیہ ناتھ پر طنزیہ حملہ کرتے ہوئے کہا کہ انہیں غیرمناسب برتاؤکرنے کے بجائے صحافی کو جلد ہی رہا کردینا چاہئے۔

کانگریس صدر نے ٹویٹ کیا،’’اگرمیرے خلاف راشٹریہ سویم سیوک سنگھ اور بی جےپی کی طرف سے غلط تشہیر کے تحت کی جانے والی جھوٹی خبروں کے سلسلے میں صحافیوں کو جیل میں ڈالیں تو زیادہ تر اخبارات اور خبررساں چینلوں میں صحافیوں کی کمی ہوجائےگی۔اترپردیش کے وزیراعلی کو بے وقوفی بھرا برتاؤکرنے کے بجائے گرفتار صحافی کو فوراً رہا کردینا چاہئے۔‘‘

واضح رہے کہ سوشل میڈیا پر وزیراعلی یوگی آدتیہ ناتھ کے خلاف قابل اعتراض تبصرہ کرنے کے معاملے میں نامہ نگار پرشانت قنوجیا کو اترپردیش پولیس نے ہفتے کو ان کے دہلی میں واقع گھر سے گرفتار کرلیا تھا۔اس کی مخالفت میں نامہ نگاروں نے احتجاجی مظاہرہ کیا تھا۔