قومی دارالحکومت دہلی اس وقت مہلک وبا کورونا وائرس سے دو چار ہے، دہلی میں ہر دن ریکارڈ توڑ کیسز درج کیے جارہے ہیں، گذشتہ روز بھی 28 ہزار کے قریب معاملے سامنے آئے تھے لیکن اس سے بھی بڑی پریشانی دہلی میں آکسیجن کی کمی ہے۔
دہلی کے کئی اسپتالوں میں آکسیجن کی بھاری قلت ہے جس کی وجہ سے مریضوں کی جان پر بن آئی ہے، اسی سے متعلق دہلی کے وزیر اعلی اروند کیجریوال نے مرکزی حکومت سے بھی مدد کی اپیل کی ہے۔
دہلی کے نائب وزیر اعلی منیش سسودیا نے دہلی میں جاری آکسیجن کی قلت پر مرکزی حکومت سے اپیل کی ہے کہ 'وہ دہلی میں آکسیجن کی ضرورت کو پورا کرنے کے ساتھ ساتھ کوٹے کو بڑھادیں کیونکہ پرانا کوٹہ موجودہ صورتحال کے لیے ناکافی ہے، اس وقت دہلی کے سرکاری اسپتالوں میں اٹھارہ ہزار مریض موجود ہیں ایسے میں انہوں نے مرکزی حکومت سے درخواست کی ہے کہ وہ دہلی کے کوٹے میں اضافہ کریں۔'