نوئیڈا: وکیل کے قتل معاملے کا ملزم انکاؤنٹر میں گرفتار

اترپردیش کے نوئیڈا میں ایک وکیل کے قتل معاملے میں ملزم سندیپ پولیس کے ساتھ تصادم میں زخمی ہوگیا۔ ملزم پر 50 ہزار کا انعام تھا۔ پولیس کے دعوے کے مطابق ملزم داروغہ ندیم علی کی پستول چھین کر فرار ہونے کی کوشش کر رہا تھا۔ اسی دوران پولیس کی فائرنگ میں زخمی ہو گیا اور بعد ازاں گرفتار کر لیا گیا۔

نوئیڈا پولیس نے کارروائی کرتے ہوئے وکیل کے قتل معاملے میں ملزم سندیپ کو گرفتار کرلیا۔ انکاؤنٹر کے دوران پولیس فائرنگ میں سندیپ کے پیر پر گولی لگی جس کے بعد پولیس نے سندیپ کو زخمی حالت میں گرفتار کرلیا۔ زخمی ملزم کو علاج کے لیے اسپتال میں داخل کرایا گیا۔ پولیس نے ملزم کے قبضہ سے واردات میں استعمال کی گئی اسکوٹی اور طمنچہ کو برآمد کرلیا۔

سینٹرل نوئیڈا کے ڈی سی پی ہریش چندر نے بتایا کہ 25 اکتوبر کو فیز ٹو پولیس اسٹیشن کی حدود میں واقع الہاباس گاؤں میں رہنے والے ایڈوکیٹ نشانت کو گولی مار کر ہلاک کر دیا گیا تھا۔ اس معاملے میں پولیس نے کلیدی ملزم سندیپ کو پکڑنے کے لیے 4 ٹیمیں تشکیل دی تھیں جبکہ اس پر 50 ہزار کے انعام کا بھی اعلان کیا گیا تھا۔

انہوں نے کہا کہ ایک انکاونٹر کے دوران پولیس نے سندیپ کو گرفتار کر لیا اور جس ہتھیار سے وکیل نشانت کا قتل کیا گیا تھا اسے بھی برآمد کرلیا گیا۔ انکاونٹر سے قبل ملزم سندیپ نے سب انسپکٹر کی پستول چھین لی اور پولیس پر جان لیوا حملہ کیا تھا۔ پولیس کی جوابی کاروائی میں سندیپ زخمی ہوگیا۔ بعد ازاں اسے گرفتار کرلیا گیا۔

ڈی سی پی نے بتایا کہ سندیپ کی اہلیہ کو پہلے ہی جیل بھیج دیا گیا۔ سندیپ مقتول وکیل نشانت کا بھتیجا ہے۔ قتل کے بعد نشانت کے افراد خاندان نے پولیس میں شکایت درج کرائی تھی کہ ’نشانت اور سندیپ کے درمیان زمین کے تعلق سے کافی عرصہ سے تنازع چل رہا تھا۔ اس کی وجہ سے سندیپ نے نشانت کا قتل کردیا۔ پولیس اس معاملے میں سندیپ کی بیوی سویتا کو پہلے ہی گرفتار کرچکی ہے۔ سویتا پر نشانت کے قتل سے متعلق جانکاری ہونے کے باوجود اسے چھپانے کا الزام عائد کیا گیا ہے۔

واضح رہے کہ نوئیڈا میں 25 اکتوبر کو ایک وکیل پر حملہ کرکے اس کا قتل کیا گیا تھا جس کے الزام میں پولیس نے سندیپ کو گرفتار کرلیا ہے۔