نوئیڈا: خواتین کے لیے قانونی خواندگی پروگرام کا انعقاد

آزادی کے امرت مہوتسو کے تحت اترپردیش کے ضلع نوئیڈا میں ضلع قانونی خدمات اتھارٹی گوتم بدھ نگر کے زیراہتمام سیکٹر 62 میں واقع سکھی ون اسٹاپ سینٹر میں آج خواتین کے لیے ایک قانونی خواندگی پروگرام کا انعقاد کیا گیا۔ اس پروگرام کا بنیادی مقصد خواتین کو ان کے حقوق اور ان سے متعلق ایکٹ سے آگاہ کرانا تھا۔

پروگرام میں جے ہند کمار سنگھ آنر سکریٹری، ڈسٹرکٹ لیگل سروسز اتھارٹی، گوتم بدھ نگر، سشما سنگھ اعزازی نائب صدر ریاستی خواتین کمیشن، شابی بانو منیجر ون اسٹاپ سنٹر کے علاوہ خواتین کی کثیر تعداد موجود تھی۔

کیمپ میں خواتین کو ان کے قانونی حقوق، جائیداد میں مساوی حقوق، متاثرین کو معاوضے کا حق، مردوں کے برابر معاوضہ، جنسی ہراسانی سے تحفظ کا حق، مفت سلائی مشین اسکیم، محفوظ ماں کی ضمانت، سمن یوجنا، سوکنیا سمردھی یوجنا، جنین قتل وغیرہ کے موضوعات پر معلومات فراہم کی گئیں اور ڈسٹرکٹ لیگل سروسز اتھارٹی کی طرف سے چلائی جانے والی سکیموں جیسے مفت قانونی امداد، ثالثی مرکز وغیرہ پر تفصیلی معلومات فراہم کی گئیں۔

ڈسٹرکٹ پروبیشن آفیسر اتل کمار سونی نے POCSO ایکٹ، کام کی جگہ پر خواتین کی جنسی ہراسانی (روک تھام، امتناع اور ازالہ) ایکٹ اور PCPNDT ایکٹ پر روشنی ڈالی۔ وہیں سکریٹری ڈسٹرکٹ لیگل سروسز اتھارٹی گوتم بدھ نگر کے ذریعہ چلائی جانے والی مفت قانونی سہولیات پر روشنی ڈالی گئی اور دیگر قانونی سہولیات کے بارے میں بھی جانکاری دی گئی۔

کمیشن کے واٹس ایپ نمبر 6306511708 پر وائس چیر پرسن اسٹیٹ خواتین کمیشن کی طرف سے شیئر کرتے ہوئے خواتین کو مشورہ دیا گیا کہ وہ کسی بھی قسم کی پریشانی کی صورت میں مذکورہ نمبر پر تحریری طور پر شکایت کریں۔ خواتین کو سیکورٹی سے متعلق مختلف ہیلپ لائن نمبروں جیسے 1098 چائلڈ ہیلپ لائن، 181 خواتین ہیلپ لائن نمبر، 112 پولیس ایمرجنسی نمبر، 1076 چیف منسٹر ہیلپ لائن اور 1090 وومن پاور ہیلپ لائن وغیرہ کے بارے میں بھی معلومات فراہم کی گئیں۔ اس پروگرام میں میڈیکل ڈپارٹمنٹ کی ایڈیشنل چیف میڈیکل آفیسر ڈاکٹر ارچنا سکسینہ، مختلف رضاکار تنظیموں جیسے پنچشیل، ایمپلائر انڈیا فار ورک، مہیلا انتی سنستھا کے نمائندوں کے ساتھ ساتھ آنگن واڑی، اسکولوں اور کالجوں کی طالبات اور مقامی خواتین نے شرکت کی۔