اقتصادی پیکیج 'سب کا ساتھ سب کا وکاس' کے فارمولے پر: شاہ

مرکزی وزیر داخلہ امت شاہ نے ’خود کفیل ہندوستان مہم‘ کے تحت غریبوں، کسانوں، مزدوروں اور دیگر طبقوں کے لیے معلنہ خصوصی اقتصادی پیکج 'سب کا ساتھ سب کا وکاس' کے فامولہ کو ثابت کرنے والا بتاتے ہوئے اس کے لئے وزیر اعظم نریندر مودی اور وزیر خزانہ نرملا سیتا رمن کے تئیں شکریہ ادا کیا ہے۔

مسٹر شاہ نے پیکج کے اعلان کے بعد آج سلسلہ وار ٹوئٹ کرتے ہوئے کہا کہ اس سے ان تمام طبقوں کے لوگوں کی زندگی آسان ہوگی اور اس سے پتہ چلتا ہے کہ حکومت اس آفت کے وقت ہر طبقہ کے تئیں فکر مند ہے۔ انہوں نے کہا کہ اس پیکیج سے ان طبقوں کے کروڑوں لوگوں کو فائدہ ہوگا اور انہیں زندگی بسر کرنے میں مدد ملے گی۔

انہوں نے کہا کہ اس پیکیج سے جہاں حاشیے پر کھڑے شخص کو فائدہ ہوگا وہیں کسانوں کو بھی فائدہ ملے گا اور زرعی شعبے میں پوزیشن مضبوط ہوگی۔ ایک ملک ایک راشن کارڈ سکیم کا ذکر کرتے ہوئے انہوں نے کہا کہ اس سے تارکین وطن محنت کشوں کو خاص طور پر فائدہ ہو گا۔ رہائشی علاقے کی مدد دے کر حکومت نے مڈل کلاس کو راحت پہنچانے کا کام کیا ہے۔