دارالحکومت دہلی میں کورونا وائرس کی مہلک وبا سے تحفظ کے لیے ریاستی حکومت کی جانب سے شہر میں لاک ڈاؤن نافذ کیا گیا ہے اس دوران تمام مذہبی مقامات پر بھی پابندیاں عائد ہونے کے سبب تمام لوگ پریشان ہیں۔
ایسی پریشان کن صورت حال کے باوجود حضرت نظام الدین اولیاء کی درگاہ سے ضرورت مندوں کے لیے مدد کے طور پر راشن کٹس، افطار اور بریانی کے پیکٹس تقسیم کرنے کا کام مسلسل جاری ہے۔
حالانکہ دہلی میں کرفیو نافذ ہونے سے قبل کورونا کی صورتحال کو دیکھتے ہوئے خواجہ کے درگاہ کو عام زائرین کے لیے بند کر دیا گیا تھا لیکن لنگر اور افطار کا اہتمام درگاہ حضرت نظام الدین اولیاء کے بند دروازوں سے جاری ہے۔
ای ٹی وی بھارت کے نمائندے سے بات چیت کے دوران درگاہ حضرت نظام الدین اولیاء کی منتظمہ کمیٹی کے جنرل سکریٹری سید کاشف علی نظامی نے بتایا کہ دہلی میں کورونا وائرس کے بڑھتے کیسز کو دیکھتے ہوئے کمیٹی نے فیصلہ کیا ہے کہ وہ ضرورت مندوں تک درگاہ کی جانب سے مدد مسلسل جاری رکھیں گے۔
فی الحال چند افراد کے علاوہ درگاہ حضرت نظام الدین میں کسی کا بھی داخلہ ممنوع ہے، البتہ درگاہ کی جانب سے غربا و مساکین کے درمیان لنگر اور افطار کے پیکٹ درگاہ کے باہر ہی تقسیم کیے جا رہے ہیں۔