'کانگریس ،راہل ملک سے معافی مانگے'

مرکزی وزیر روی شنکر پرساد نے کانگریس اور اس کے سابق صدر راہل گاندھی سے مطالبہ کیا ہے کہ وہ ملک سے باقاعدہ معافی مانگیں ۔

بھارتیہ جنتا پارٹی نے رافیل معاملہ میں سپریم کورٹ کے آج کے فیصلہ کو سچائی اور ملک کی سلامتی کی فتح نیز مودی حکومت کی ایمانداری پر عدالت کی مہر قراردیا ہے ۔

بی جے پی کے سینئر لیڈر اور مرکزی وزیر روی شنکر پرساد نے بی جے پی ہیڈکوارٹر میں ایک پریس کانفرنس میں کہا کہ سپریم کورٹ نے رافیل کےسلسلہ میں 14دسمبر 2018کو اپنے فیصلہ پر نظر ثانی کی عرضی کو آج خارج کردیا ۔

آج کے اس فیصلہ سے سچائی اور ملک کی سلامتی کی فتح ہوئی ہے اور مودی حکومت کے ایماندارانہ فیصلہ پر سپریم کورٹ کی مہر لگی ہے ۔

انھوں نے کہاکہ سپریم کورٹ کے آج کے فیصلہ کے بعد کانگریس اور اس کے سابق صدر راہل گاندھی سے مطالبہ کرتے ہیں کہ وہ ملک سے باقاعدہ معافی مانگیں اور بتائیں کہ کانگریس اور وہ رافیل کے تعلق سے جھوٹ کی بنیاد پر اتنا جارحانہ ،بے بنیاد ،شرمناک مہم کیوں اور کس کے اشارے پر چلارہے تھے ۔

انھوں نے کہاکہ جن کے پورے ہاتھ جیپ گھپلہ لیکر اسکارپین آبدوز اور اگستا ویسٹ لینڈ ہیلی کاپٹر تک دفاعی سودوں میں بدعنوانی سے رنگے ہیں ،وہ ملک کی سلامتی کے ساتھ کھلواڑ کو امداد یافتہ پروگرام کی طرح انصاف درخواست کی شکل میں پیش کررہے تھے ۔