کیجریوال کا وزیر اعظم کو مکتوب، دہلی میں آکسیجن سپلائی اور بیڈ بڑھانے کا مطالبہ

دہلی کے وزیر اعلی اروند کیجریوال نے وزیر اعظم نریندر مودی کو ایک مکتوب روانہ کیا ہے۔ اس خط میں وزیر اعلیٰ کیجریوال نے دہلی کے ہسپتالوں میں آکسیجن کی فراہمی کو یقینی بنانے اور کورونا متاثرین کے لیے 7000 بیڈ مہیا کرانے کی درخواست کی ہے۔

وزیر اعلیٰ دہلی نے وزیر اعظم کو لکھے گئے خط میں دہلی میں کورونا کی سنگین صورتحال کا ذکر کیا ہے۔ کجریوال نے لکھا ہے کہ آکسیجن کی بہت کمی ہے، آئی سی یو کے تمام بیڈ بھرے ہیں۔ ہم سب اپنی سطح پر کوششیں کررہے ہیں لیکن آپ کے تعاون کی ہمیں ضرورت ہے۔

وزیر اعلی اروند کیجریوال نے وزیر اعظم نریندر مودی کو ایک مکتوب

اروند کیجریوال نے خط میں مزید لکھا ہے کہ دہلی کے سرکاری اسپتالوں میں تقریبا 10 ہزار بیڈز ہیں۔ جن میں سے کورونا متاثرین کے لیے 1800 مختص ہیں۔ کورونا کی سنگین صورتحال کو دیکھتے ہوئےآپ سے درخواست ہے کہ کم سے کم 7 ہزار بیڈز کورونا کے لیے مختص کریں۔ وزیر اعلی نے وزیر اعظم کو لکھے گئے خط میں یہ بھی کہا ہے کہ دہلی میں آکسیجن کی بھی بہت قلت ہے۔ ہمیں فوری طور پر آکسیجن بھی فراہم کیا جانا چاہیے۔

انہوں نے مزید یہ بھی لکھا کہ میں نے اس تعلق سے تمام تر معلومات مرکزی وزیر صحت ڈاکٹر ہرش وردھن اور آج صبح وزیر داخلہ امت شاہ کو بھی دی ہے۔ دہلی میں ڈی آر ڈی او کے ذریعہ تعمیر کیے جارہے 500 آئی سی یو بیڈز والے کووڈ کیئر سنٹر کے لئے دہلی کے وزیر اعلیٰ نے وزیر اعظم کا شکریہ ادا کیا ہے۔ مزید ان سے درخواست کی ہے کہ اگر اسے ایک ہزار بیڈز کا بنایا جائے تو زیادہ بہتر ہوگا۔

اروند کیجریوال نے خط میں اس بات کی بھی تصدیق کی ہے کہ' اب تک ہمیں اس وبا کے دوران میں مرکز کی حمایت حاصل رہی ہے مزید ہمیں یہ امید ہے کہ آپ مذکورہ مسائل پر ہماری مدد کریں گے۔