اتراکھنڈ: سی اے اے و این آر سی کے خلاف مسلسل احتجاج

اتراکھنڈ کے منگلورشہرمیں مسلسل خواتین شہریت ترمیمی قانون کے خلاف احتجاجی مظاہرے کررہی ہیں، خواتین کا مطالبہ ہے کہ مرکزی حکومت جلد ازجلد اس قانون کو واپس لے۔

ایک طرف جہاں پورے بھارت میں سی اے اے اور این آر سی کے خلاف احتجاج کا سلسلہ جاری ہے، وہیں اتراکھنڈ کے شہر منگلور میں ایک بار پھرخواتین کی ایک بڑی تعداد نے اس قانون کے خلاف احتجاج کیا۔

مرکزی حکومت کے خلاف اتراکھنڈ کی خواتین بھی ناراضگی کا اظہار کر رہی ہیں اور اس قانون کو واپس لیے جانے کا مطالبہ کر رہی ہیں۔

منگلور گراؤنڈ میں جاری احتجاج پر علاقے کے ایم ایل اے قاضی نظام الدین نے مرکزی حکومت کو متنبہ کیا اور انہوں نے کہاکہ' اگر لوگوں پر یہ قانون زبردستی نافذ کیا گیا تو اس کی سخت مخالفت کی جائے گی۔

قاضی نظام الدین نے کہا کہ مودی حکومت ملک کے آئین کو پس پشت ڈال کر ہندو مسلمانوں اور سکھوں کو نشانہ بنانے کی کوشش کر رہی ہے۔

اس دوران نوجوان رہنما ڈاکٹر نیئر کاظمی نے کہا کہ آج جس طرح سے خواتین گھروں سے باہر نکل کر سی اے اے کے خلاف احتجاج کر رہی ہیں۔ اسی طرح ہی یہ خواتین اس قانون کی سخت مخالفت کرتی رہیں گی۔