تمل ناڈو: لاک ڈاؤن میں 12 جولائی تک کی توسیع

طبی ماہرین اور سینئر افسران کے ساتھ کووڈ19 کی صورتحال کا جائزہ لینے کے بعد ریاست تمل ناڈو کے وزیر اعلیٰ ایم کے اسٹالن نے لاک ڈاؤن کو مزید ایک ہفتے کے لیے بڑھانے کا فیصلہ کیا ہے۔

ریاست تمل ناڈو کے وزیر اعلیٰ ایم کے اسٹالن نے ہفتے کے روز ریاست کے کئی اضلاع میں کورونا کے بڑھتے کیسز کے پیش نظر لاک ڈاؤن 12 جولائی تک بڑھائے جانے کا اعلان کیا۔

اسٹالن نے طبی ماہرین اور سینئر افسران کے ساتھ کووڈ-19 صورتحال کا جائزہ لینے کے بعد لاک ڈاؤن کو مزید ایک ہفتے کے لیے بڑھانے کا فیصلہ کیا حالانکہ اس بار پابندیوں میں کٹیگری کے بجائے پورے صوبے میں یکساں چھوٹ بھی دی گئی ہے۔

ریاست میں مکمل لاک ڈاؤن 10 مئی کو لگایا گیا تھا جس کے بعد مرحلہ وار طریقے سے چھوٹ کے ساتھ ہر ہفتے اس کی توسیع کی جاتی رہی۔ فی الحال لاک ڈاؤن کی مدت پانچ جولائی کو ختم ہو رہی ہے۔

قبل ازیں کورونا کیسز کی بنیاد پر اضلاع کو تین کٹیگریز میں رکھ کر لاک ڈاؤن میں چھوٹ دی گئی تھی۔ وزیر اعلیٰ نے اس کٹیگرائیزیشن کو ختم کرتے ہوئے پیر کے روز ریاست کے تمام اضلاع میں یکساں چھوٹ دینے کا اعلان کیا ہے۔

اسٹالن نے کہا کہ اس دوران انٹر-اسٹیٹ سرکاری اور پرائیویٹ بس سروسز پر پابندی جاری رہے گی۔ ریاست کے تمام سنیما گھر، بار، سویمنگ پول، سماجی اور سیاسی میٹنگ، انٹرٹینمنٹ سے متعلق پروگرام، کھیل انعقاد، اسکول، کالج اور چڑیا گھر بھی بند رہیں گے۔