تمل ناڈو: کورونا معاملے 2لاکھ سے تجاوز

تمل ناڈو میں عالمی وبا کورونا وائرس کے قریب سات ہزار نئے معاملات کے ساتھ ہی متاثرہ افراد کی تعداد 2،06،737 تک جا پہنچی ہے۔ وہیں مزید 89 افراد کی ہلاکت کے بعد اموات کی تعداد 3409 ہوگئی ہے۔

ریاست تمل ناڈو میں کورونا وائرس (کووڈ ۔19) کی وبا رکنے کا نام نہیں لے رہی ہے، جہاں ہفتہ کے روز ریکارڈ 6988 نئے معاملے سامنے آنے کے بعد متاثرہ افراد کی تعداد 2.06 لاکھ سے زیادہ ہوگئی۔ تاہم راحت کی بات یہ ہے کہ صحت یاب ہونے والے افراد کی شرح 73 فیصد سے زیادہ ہوگئی ہے۔

ریاست میں متاثرہ مریضوں کی شفایابی کی شرح بڑھ کر 73.06 فیصد ہوگئی ہے جبکہ اموات کی شرح کم ہوکر 1.64 فیصد ہو گئی ہے۔

سرکاری ذرائع کے مطابق ریاست میں متاثرہ افراد کی تعداد 2،06،737 تک جا پہنچی ہے۔ ریاست میں گزشتہ 24 گھنٹوں کے دوران مزید 89 افراد کی ہلاکت کے بعد اموات کی تعداد 3409 ہوگئی ہے۔

ذرائع کے مطابق اس عرصے کے دوران مزید 7758 مریض صحت یاب ہوئے ہیں، جس سے شفایاب افراد کی مجموعی تعداد 1،51،055 ہوگئی ہے۔ ریاست میں فی الحال 52،273 فعال معاملے ہیں جن کا مختلف اسپتالوں میں علاج چل رہا ہے۔

قابل ذکر ہے کہ عالمی وبا کورونا وائرس کے سبب ملک بھر میں اب تک 31ہزار سے زائد افراد فوت ہو چکے ہیں۔ وہیں اس وبائی مرض کی زد میں آکر 13لاکھ سے زائد افراد متاثر ہو چکے ہیں۔