'ہندو مسلم اتحاد کی مثال ہے قاضی ابد شاہ کا مزار'

ریاست بہار کے ضلع بھاگلپور میں حضرت قاضی ابد شاہ رحمت اللہ علیہ کا عرس انتہائی تزک و احتشام کے ساتھ منایا گیا۔

رسم و رواج کے مطابق ان کے مزار پر چادر پوشی کی گئی اور گلہائے عقیدت پیش کئے گئے۔ بتایا جاتا ہے کہ 16ویں صدی عیسوی میں حضرت شہباز محمود بھاگلپوری کے داماد قاضی ابد شاہ یہاں کے قاضی ہوا کرتے تھے، ان کی وفات 18ویں صدی عیسوی میں ہوئی اور ان کے ذریعہ تعمیر کردہ مسجد اور عمارتیں اب بھی موجود ہیں اور ان کا عرس ہر سال منایا جاتا ہے۔

اس عرس کی خاص بات یہ ہے کہ یہاں مسلمانوں کے ساتھ ساتھ بڑی تعداد میں غیر مسلم مردوخواتین بھی بابا ابد شاہ کے دربار میں حاضری دیتے ہیں اور منتیں مانگتے ہیں۔ انہیں عقیدت مندوں میں ویشنوی گپتا بہنیں بھی ہیں جو اسی محلہ میں رہتی ہیں اور عرس کے علاوہ عام دنوں میں بھی بابا کے دربار میں حاضری دیتی ہیں۔ ان کا کہنا کہ بابا نے ان کی ساری مرادیں پوری کی ہیں۔

ان کا ماننا ہے کہ ہم سبھی ایک ہی پروردگار کی مخلوق ہیں لہذا ہندو مسلم کے درمیان منافرت کسی بھی لحاظ سے ایک مہذب معاشرے کو زیب نہیں دیتا۔ وشنوی گپتا نے بتایا کہ ان کے آباواجداد بھی بابا ابد شاہ کے عقیدت مند رہے ہیں اور ہم لوگ بھی برابر ان کے دربار میں حاضری دیتے ہیں۔ انہوں نے کہا کہ ملک کی ترقی اسی میں ہے کہ سبھی مذاہب کے لوگ ایک ساتھ مل کر رہیں۔

بھاگلپور کو صوفی سنتوں کا شہر بھی کہا جاتا ہے اور اس علاقے میں اسلام کی اشاعت میں ان صوفیاء کرام کا اہم کردار رہا ہے۔ انہیں میں سے قاضی ابد شاہ رحمت اللہ علیہ بھی تھے جو اس علاقے کے قاضی ہوا کرتے تھے اور مظلوموں کو انصاف دلاتے تھے۔