یادگیر: ویک اینڈ لاک ڈاؤن کا دوسرا دن

یادگیر شہر کے میدان علاقے اور چما لیے آوٹ میں چند دکانیں کھلی تھیں جن پر محکمہ بلدیہ کی جانب سے دو ہزار سے پانچ ہزار روپے تک کا جرمانہ لگایا گیا۔

ریاست کرناٹک کے ضلع یادگیر میں ویک اینڈ لاک ڈاؤن کے دوسرے دن بھی تمام کاروبار مکمل گائیڈ لائن پر عمل کرتے ہوئے بند رہے۔ شہر کے علاقے میدان، اور چما لیے آوٹ میں چند دکانیں کھلی تھیں، جن پر محکمہ بلدیہ کی جانب سے دو ہزار سے پانچ ہزار روپے تک کا جرمانہ لگایا گیا۔

کئی دکانداروں نے محکمہ بلدیہ اور پولیس کی اس کارروائی کے تعلق سے کہا کہ 'ان علاقوں میں دو دو ہسپتال ہیں، لوگوں کو دودھ اور پانی کی ضرورت پیش آتی ہے۔ اس لیے دکانیں کھولی گئی ہیں۔'

ضلعی انتظامیہ کی جانب سے صبح 6 تا 10 بجے تک کا وقت دیا گیا ہے جس میں دودھ، سبزیاں اور کرانہ کی دکانیں شامل ہیں ان دکانوں کے علاوہ تمام دکانیں ویک اینڈ لاک ڈاؤن کی وجہ سے پچھلے دو دنوں سے بند ہیں۔

خاص کر سونا چاندی، کپڑے، چپل و دیگر چیزوں کی دکانیں بند ہونے کی وجہ سے لوگوں کو کافی مشکلات کا سامنا ہے کیونکہ رمضان اور شادیوں کا سیزن ایک ساتھ ہونے کی وجہ سے لوگوں کو زیادہ پریشانیاں لاحق ہیں۔