'میرے گھر کو جلانے میں میرے حلقے کے باشندوں کا ہاتھ نہیں'

ریاست کرناٹک کے دارالحکومت بنگلور میں گذشتہ دن رکن اسمبلی اکھنڈ شری نواس مورتی کے گھر پر کچھ شر پسندوں نے حملہ کرتوڑ پھوڑ مچایا تھا اور آتشزنی کی تھی، جس میں ان کا کافی نقصان ہوا۔

واضح رہے کہ کانگریس کے رکن اسمبلی اکھنڈ شرینواس مورتی کے بھتیجے پی نوین نے منگل کے روز اپنے سوشل میڈیا اکاؤنٹ پر پیغمبر اسلام ﷺ کی شان میں گستاخانہ پوسٹ کی جس کی وجہ سے بنگلور شہر کے مسلمانوں میں کافی ناراضگی پائی گئی اور گزشتہ دنوں شہر بھر کافی ہنگامہ برپا رہا۔ حادثے کے دو دن بعد رکن اسمبلی اکھنڈ شری نواس مورتی نے اپنے گھر کا دورہ کیا۔

اس موقع پر نامہ نگاروں سے بات کرتے ہوئے شری نواس مورتی نے کہا کہ برسوں سے ہم ہندو مسلم و سبھی مذاہب کے لوگ بلا کسی تفریق بھائی چارگی کے ساتھ رہے ہیں لیکن افسوس ہے کہ ایسے میں ان کے گھر کو تشدد کا نشانہ بنایا گیا۔

اس تشدد کے پیچھے کسی پارٹی یا تنظیم کے ممکنہ سازش کے متعلق پوچھے جانے پر شری نواس مورتی نے بتایا کہ انہوں نے کبھی نفرت کی سیاست نہیں کی اور انہیں کسی پر شبہ نہیں ہے تاہم انہوں نے کہا کہ' تحقیقات ہی اس وجہ کو بےنقاب کرسکتی ہے'۔

'میرے گھر کو جلانے میں میرے حلقے کے باشندوں کا ہاتھ نہیں'

شری نواس مورتی نے کہا کہ حملے کے سبب ہوئے نقصانات کے تعلق سے ذاتی طور پر پولیس میں شکایت درج کرائیں گے۔ انہوں نے حملے کے تعلق سے یہ بات بھی کہی کے اس حملے میں میرے حلقے کے باشندوں کا کوئی ہاتھ نہیں۔

اس پورے معاملے کے دوران مظاہرین میں سے 3 افراد ہلاک ہوئے ہیں اور تقریباً 147 مشتبہ فسادیوں کو حراست میں لیا گیا ہے۔

اب حالات معمول و پرامن ہیں اور پولیس کے اعلیٰ عہدیداروں کی جانب سے تحقیقات جاری ہے۔