رکن پارلیمان اعظم خان کے قریبی مانے جانے والے سابق سی او آل حسن خان کو بھی پولیس نے آخرکار گرفتار کر لیا۔ یہ گرفتاری 10 اگست کو اس وقت عمل میں آئی جب آل حسن خود سپردگی کے لیے کورٹ میں پیش ہونے پہنچے تھے۔ وہ جیسے ہی کورٹ پہنچے تھانہ سول لائن پولیس نے ان کو کورٹ احاطہ سے ہی گرفتار کر لیا۔
پولیس کپتان شگن گوتم نے جانکاری دیتے ہوئے بتایا کہ سابق سی او آل حسن پر جبراً زمینوں پر قبضے، لوٹ اور مارپیٹ جیسے مختلف تھانوں میں تقریباً 53 مقدمات درج ہیں۔ انہوں نے کہا کہ پولیس کافی دن سے ان کی تلاش میں تھی۔ شگن گوتم نے بتایا کہ ان پر 25 ہزار کا انعام بھی رکھا گیا تھا۔ انہوں نے کہا کہ کورٹ سے آل حسن کے خلاف این بی ڈبلیو کا نوٹس جاری ہوا تو وہ کورٹ میں حاضر ہوئے وہیں سے ان کو گرفتار کر لیا گیا۔
واضح رہے کہ آل حسن خان سماجوادی سرکار میں رکن پارلیمان اعظم خان کے کافی قریبی مانے جاتے تھے۔ یہی وجہ ہے کہ اعظم خان کے خلاف درج متعدد مقدموں میں آل حسن خان کا بھی نام شامل ہے۔ دوسری طرف گرفتاری سے قبل آل حسن خان نے اپنی ایک ویڈیو وائرل کرکے کہا تھا کہ میں آج پیشی میں آیا ہوں پولیس میرے خلاف کچھ بھی کر سکتی ہے۔
